Երևան-Բաթումի ուղևորատար գնացքը կմեկնարկի հունիսի 14-ից

20 մայիսի 2025 - 19:21 AMT

PanARMENIAN.Net - «Հարավկովկասյան երկաթուղի» ընկերությունն հայտարարել է, որ հունիսի 14-ից սկսելու է շահագործվել Երևան-Բաթումի-Երևան միջազգային ուղևորատար գնացքը։ Այս որոշումը կայացվել է մայիսի 20-ին Երևանում անցկացված աշխատանքային հանդիպման ընթացքում՝ «ՀԿԵ»-ի և «Վրացական երկաթուղի» ընկերության ղեկավարների միջև ձեռք բերված պայմանավորվածության արդյունքում։

Գնացքը կգործի օրը մեջ՝ զույգ օրերին կմեկնի Երևանից, կենտ օրերին՝ Բաթումիից։ Երթուղին կգործի մինչև հոկտեմբերի 2-ը։ Նշված ժամանակահատվածում ժամանակավորապես կդադարեցվի Երևան-Թբիլիսի-Երևան գնացքի երթևեկությունը։

ՀԿԵ գլխավոր տնօրեն Ալեքսեյ Մելնիկովը նշել է․ «Երևան-Բաթումի-Երևան ուղղությունը մնում է պահանջված թե՛ Հայաստանի քաղաքացիների, թե՛ օտարերկրյա զբոսաշրջիկների շրջանում։ Ամառային սեզոնը ուղևորահոսքի տեսանկյունից ամենաակտիվ շրջանն է, և մենք վրացի գործընկերների հետ համատեղ ներդնում ենք բոլոր ջանքերը՝ ապահովելու անվտանգ, հարմարավետ և որակյալ սպասարկում։ Բացի այդ, ամառային ամիսներին կգործի նաև Երևան-Սևան-Շորժա ուղղությամբ էլեկտրագնացք, որը նույնպես մշտապես պահանջված է»։

Նիստի ընթացքում անդրադարձ է կատարվել նաև զբոսաշրջային գնացքի մեկնարկի նախագծին, որն իրականացվելու է չեխական «Gepard Express» ընկերության նախաձեռնությամբ։ Նախագծի համաձայն՝ զբոսաշրջիկներին կառաջարկվի երթուղի՝ 3 օր Հայաստանում և 6 օր Վրաստանում, հիմնականում եվրոպացի ճանապարհորդների համար։

Երևան-Բաթումի-Երևան միջազգային երթուղով շահագործվող գնացքն ունենալու է ժամանակակից վագոններ՝ երեք տարբեր դասերի՝ պլացկարտ, կուպե և ՍՎ։ Ճանապարհորդությունը կտևի մոտ 16 ժամ։ Տոմսեր կարելի է ձեռք բերել թե՛ Հայաստանի, թե՛ Վրաստանի հիմնական երկաթուղային կայարաններում, ինչպես նաև առցանց՝ www.railway.am կայքի միջոցով։