Պապոյան․ Հայկական բեռների մի մասը մնացել է «Բանդար Աբբաս» նավահանգստում և Իրանի ճանապարհներին

PanARMENIAN.Net - ՀՀ էկոնոմիկայի նախարար Գևորգ Պապոյանը հայտնել է, որ հայկական բեռների մի մասը մնացել է «Բանդար Աբբաս» նավահանգստում և Իրանի ճանապարհներին։ Այդ հայտարարությամբ նախարարը հանդես է եկել ԱԺ տնտեսական հարցերի հանձնաժողովում՝ 2024 թվականի պետական բյուջեի կատարողականի քննարկման ընթացքում՝ արձագանքելով պատգամավորի հարցին։

Նա հիշեցրել է, որ Արտաքին գործերի նախարարությունն արդեն հրապարակել է իր պաշտոնական դիրքորոշումը՝ ընդգծելով տարածաշրջանում խաղաղության հաստատման անհրաժեշտությունը։ Ըստ նախարարի՝ կայունությունը չափազանց կարևոր նշանակություն ունի թե՛ Հայաստանի, թե՛ մյուս երկրների համար, հայտնում է Sputnik Արմենիան։

«Մենք դժվարություններ ունենք ինչպես ներմուծման, այնպես էլ արտահանման հարցում, ընդ որում` ինչպես դեպի Իրան, այնպես էլ նրա տարածքով։ Սրանք գործոններ են, որոնք գրեթե մեր վերահսկողությունից դուրս են, բայց հույս ունենք, որ հակամարտությունը կկարգավորվի, և մենք կկարողանանք ապրանքներ տեղափոխել բարեկամ Իրանի տարածքով, ինչպես նախկինում», – հայտարարել է նախարարը։

Հունիսի 13-ի վաղ առավոտյան Իսրայելը լայնածավալ ռազմական գործողություններ է սկսել Իրանի դեմ։ Իսրայելի իշխանությունները նշել են, որ իրենց նպատակը հրեական պետության անվտանգությանը սպառնացող վտանգի կանխումն է՝ պնդելով, թե իրենց հետախուզական տվյալներով Իրանը միջուկային զենքի ստեղծման հարցում մոտեցել է անդառնալի սահմանագծին։ Իրանը սկսել է պատասխան հարվածներ հասցնել Իսրայելի ուղղությամբ։ Այդ օրվանից սկսած, կողմերը պարբերաբար հրթիռակոծում են միմյանց։