Սամվել Կարապետյանին անսպասելիորեն տեղափոխել են «Արմավիր» ՔԿՀ, ոչ թե «Կենտրոն»

PanARMENIAN.Net - Գործարար և բարերար Սամվել Կարապետյանին անսպասելիորեն տեղափոխել են «Արմավիր» քրեակատարողական հիմնարկ, այն դեպքում երբ, ըստ նրա պաշտպանական խմբի, նա պետք է գտնվեր «Կենտրոն» ՔԿՀ-ում։

Փաստաբան Լիանա Գասպարյանը հայտնել է, որ այս որոշումը իրենց համար եղել է անակնկալ, հայտնում է Aysor.am-ը։

«Չեմ կարող ասել, թե ինչու նման որոշում կայացվեց, բայց անսպասելի էր»,- ասել է նա։

Փաստաբանական խմբի մեկ անդամ այցելել է Կարապետյանին գիշերը, մյուսը գտնվում է նրա մոտ ներկայումս, իսկ Լիանա Գասպարյանը պատրաստում է բողոք՝ Վերաքննիչ դատարան ներկայացնելու նպատակով։

Երևանի ընդհանուր իրավասության քրեական դատարանի դատավոր Արտակ Կարապետյանի որոշմամբ Սամվել Կարապետյանը կալանավորվել է երկու ամսով՝ Քննչական կոմիտեի միջնորդությունն ամբողջությամբ բավարարելուց հետո։

Քննչական կոմիտեի հայտարարության համաձայն՝ Սամվել Կարապետյանը զանգվածային լրատվամիջոցների միջոցով տված հարցազրույցում կատարել է հրապարակային կոչեր, որոնք միտված են եղել սահմանադրությամբ չնախատեսված եղանակով իշխանությունը զավթելուն և կառավարության լիազորություններին տիրանալուն։

Ի պատասխան Փաշինյանը գրել էր․ «Պոռնկաբարո «հոգևորականներն» ու նրանց պոռնկաբարո «բարեգործներն» ինչո՞ւ են ակտիվացել։ Ոչինչ՝ նորից կպասիվացնենք։ Ընդ որում՝ ընդմիշտ»: Ավելի ուշ նա հավելել է, որ ՀԷՑ–ը պետք է պետականացվի և շատ արագ։