FlyOne Armenia-ի առաջին A321 օդանավն է գրանցվել ՀՀ–ում

26 հունիսի 2025 - 11:02 AMT

PanARMENIAN.Net - Հայկական FlyOne Armenia ավիաընկերության շարժակազմում գրանցվել է առաջին Airbus A321 տիպի ինքնաթիռը (ՀՀ գրանցումը՝ EK-FOD):

Օդանավը Երևան է ժամանել հունիսի 24-ին կիպրական Լառնակայից, որտեղ գտնվում էր տեխսպասարկման նպատակով, հայտնում է «Հետքը»։

EK-FOD-ն արդեն հասցրել է կատարել իր առաջին չվերթը Երեւան-Մոսկվա ուղղությամբ։

2006 թվականին արտադրված այս ինքնաթիռը մինչ այժմ գործածվել է մի շարք երկրներում՝ Սալվադորում, Պերուում, Լատվիայում ու Թուրքիայում:

Հայաստանի օդանավերի ռեեստրում գրանցվելուց առաջ A321-ը կրել է լատվիական գրանցում՝ YL-LDQ, և ընդգրկված է եղել տեղական SmartLynx ավիաընկերության պարկում։ Վերջինս վարձակալությամբ օդանավեր տրամադրող ընկերություն է։ Հատուկ այս ինքնաթիռը՝ YL-LDQ-ն, 2023-2025 թվականներին սպասարկել է թուրքական AJet (նախկինում՝ AnadoluJet) ավիաընկերության չվերթները։ Սակայն 2024-ի հունվարից այն այլևս չի շահագործվել․ այդ ամիս Թուրքիայից իրականացվել է տեխնիկական թռիչք դեպի Չեխիա, որտեղից էլ փետրվարին տեղափոխվել է Մեծ Բրիտանիա։ Մայիսի 28-ին, կրկին տեխնիկական չվերթով, ինքնաթիռը հասել է Կիպրոսի Լառնակա քաղաք, որտեղ կայանված է եղել մինչև հունիսի 24-ը՝ Հայաստանի ուղղությամբ մեկնարկից առաջ։

Սա FlyOne Armenia-ի առաջին Airbus A321 մոդելն է։ Մինչ այժմ ընկերությունն օգտագործել է միայն Airbus A319 և A320 տիպի ինքնաթիռներ:

Ներկայում ավիաընկերության շարժակազմում, բացի EK-FOD-ից, ներառված է նաև երկու Airbus A320 օդանավ՝ գրանցված որպես EK-FOB և EK-FOC։ EK-FOB-ը ընկերության պարկում ընդգրկվել է 2023-ի մայիսին, իսկ EK-FOC-ը՝ 2025-ի մարտին:

FlyOne Armenia-ն շահագործում է նաև վարձակալված օդանավեր՝ մոլդովական Fly One ընկերությունից վերցված A320 (գրանցում՝ ER-00007), ինչպես նաև կամբոջական Sky Angkor Airlines-ից վարձակալված երկու A320 (գրանցումներ՝ XU-727 և XU-730):

Ըստ ավիաընկերության հայտարարության՝ Airbus A321-ը ձեռք է բերվել ոչ թե վարձակալությամբ, այլ սեփականության իրավունքով։ Ընկերության տվյալներով՝ այս պահին ունի 9 ինքնաթիռ, որոնցից 5-ն իրեն են պատկանում:

Այնուամենայնիվ, իրականում գործող պարկում շահագործվում է 6 ինքնաթիռ, որոնցից երեքն են գրանցված Հայաստանում։ Քաղաքացիական ավիացիայի ոլորտում տարածված է երկարաժամկետ վարձակալության պրակտիկան՝ երբ օդանավերը վերցվում են խոշոր լիզինգատու կազմակերպություններից, սակայն կայացած ավիաընկերությունները հաճախ ձեռք են բերում ինքնաթիռներ սեփականության հիմքով:

«Ֆլայուան Արմենիա» ՍՊԸ-ն հիմնադրվել է 2021 թվականի մարտին, իսկ իր առաջին թռիչքը իրականացրել է նույն տարվա դեկտեմբերին։ Նախկին հրապարակումների համաձայն՝ սա հայ-մոլդովական համատեղ ձեռնարկություն է, որում ներգրավված են Սուքիասյան եղբայրները:

FlyOne Armenia-ի բաժնետերերից 41 տոկոսը պատկանում է ԱԺ պատգամավոր Խաչատուր Սուքիասյանի եղբորը՝ գործարար Էդուարդ Սուքիասյանին։ Եվս 4 տոկոս բաժնեմաս ունի ՀՀ քաղաքացի, երևանցի Լարիսա Սահակովան՝ ընկերության նախկին տնօրեն Արթուր Պողոսբեկյանի մայրը։ Քանի որ Պողոսբեկյանը ՌԴ քաղաքացի է, Սահակովայի անունով գրանցումն արվել է՝ պահպանելու համար օրենքով սահմանված՝ հայկական կողմի բաժնեմասի նվազագույն շեմը։ Մնացած 9 տոկոսը պատկանում է «ՍԻԼ Կապիտալ» ՍՊԸ-ին, որի խորհրդի նախագահն Էդուարդ Սուքիասյանն է։ Ընկերության միանձնյա սեփականատերը՝ Սասուն Գասպարյանը Ուջան գյուղից, համարվում է Սուքիասյանների բիզնեսին փոխկապակցված անձ։