Թաթոյան․ Փաշինյանը ԵՊՀ-ում ասել է՝ հանձնարարել է տվյալներ հավաքել կաթողիկոսի անձնական կյանքի մասին

PanARMENIAN.Net - Մարդու իրավունքների նախկին պաշտպան Արման Թաթոյանը, հունիսի լույս 28–ի գիշերը դատարանի շենքի մոտ լրագրողների հետ զրույցում ասել է, որ «վարչապետ Նիկոլ Փաշինյանը հանձնարարել է տվյալներ հավաքել կաթողիկոսի անձնական կյանքի մասին»։

«Հայաստանի կառավարության ղեկավարը հայտարարում է, սպառնում է նաև, կա հրապարակված ու չհերքված ինֆորմացիա, որ իրավապահ մարմիններին հանձնարարված է եկեղեցականների անձնական կյանքի վերաբերյալ տեղեկատվություն հավաքել»,-ասել է նա, հայտնում է Panorama.am-ը։

Նա հստակեցրել է, որ ԵՊՀ-ում Փաշինյանի հետ հանդիպումից հետո ներկաներն էին հրապարակել ինֆորմացիա, որ հանձնարարել է հատուկ մարմիններին հավաքել տեղեկաություններ Ամենայն Հայոց կաթողիկոսի անձնական կյանքի վերաբերյալ:

«Ակնհայտ է, որ դա հավաքագրվել է քաղաքական դիվիդենտներ ստանալու նպատակով ինչ-որ մի պահի օգտագործելու համար՝ ելնելով քաղաքական նպատակահարմարությունից»,- շեշտել է Թաթոյանը։

Նա ընդգծել է, որ եկեղեցու դեմ իրականացվող այս գործընթացը բացառապես քաղաքական դրդապատճառներ ունի։

«Շատ ակնհայտ է, որ վարչապետը քաղաքական հրահանգներով ուղղորդում է իրավապահների գործողությունները։ Նա անթաքույց դա ցույց է տալիս։ Սրանք իրավական գործընթացներ կոչելը դժվար է, դրդապատճառներն ամբողջովին քաղաքական են»,- եզրափակել է Թաթոյանը։

Հունիսի 27–ի առավոտյան մոտ 30 դիմակավորված անձ ներխուժել էր Շիրակի թեմի առաջնորդարան։ Շիրակի թեմի առաջնորդ Միքայել արքեպիսկոպոս Աջապահյանը, սակայն, Մայր աթոռ Սուրբ Էջմիածնում էր, որտեղ Քահանայից ժողով էր նախատեսված։ ԱԱԾ-ն մտել էր Մայր աթոռի տարածք՝ ձերբակալելու Աջապահյանին։ Սրբազանը հայտարարել էր, որ պատրաստվում է գնալ իրավապահների հետ, բայց տեղի ունեցած հրմշտոցից հետո նա կաթողիկոսի հետ գնաց Վեհարան։ Ավելի ուշ նա ներկայացավ ՔԿ և դատարանի որոշմամբ կալանավորվեց 2 ամսով։

Աջապահյանի նկատմամբքրեական գործ է հարուցվել իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով։