ՄԱԳԱՏԷ–ի ղեկավար Ռաֆայել Գրոսին հայտարարել է, որ Իրանը կարող է ամիսների ընթացքում վերսկսել ուրանի հարստացումը զենքի համար։ Դա հակասում է ԱՄՆ նախագահ Դոնալդ Թրամփի այն հայտարարությանը, որ Իրանի միջուկային օբյեկտներն «ամբողջությամբ ոչնչացված են»։

Ըստ Գրոսիի, ԱՄՆ հարվածներն Իրանի 3 միջուկային օբյեկտի հասցրել են լուրջ, բայց ոչ «լիարժեք վնաս», գրում է BBC-ն։

«Հնարավոր չէ պնդել, թե ամեն ինչ վերացել է և այլևս ոչինչ չկա»,-ասել է Գրոսին:

Իսրայելի կողմից հունիսի 13–ին իրականացված հարձակումների ու հետագայում ԱՄՆ–ի հարվածները Ֆորդոյի, Նաթանզի և Իսֆահանի կայաններին հասված հարվածների չափը դեռ պարզ չէ:

Ավելի վաղ Գրոսին ասել էր, որ Թեհրանը կարող է ունենալ «մի քանի ամսվա ընթացքում… կարող է վերականգնել մի քանի ցենտրիֆուգերի աշխատանքը»: Նա հավելել էր, որ Իրանը դեռևս ունի «արդյունաբերական և տեխնոլոգիական կարողություններ... այնպես որ, եթե ցանկանան, կկարողանան նորից սկսել դա»:

Թրամփը դրան արձագանքել էր՝ հայտարարելով, որ Իրանի կայանները «լիովին ոչնչացվել են», և մեղադրել է լրատվամիջոցներին՝ «պատմության ամենահաջող ռազմական հարվածներից մեկը նսեմացնելու փորձի մեջ»:

Առայժմ Իրանը և Իսրայելը համաձայնության են եկել հրադադարի շուրջ: Սակայն Թրամփը նշել է, որ նա կմտածի Իրանը կրկին ռմբակոծելու մասին, եթե հետախուզությունը պարզի, որ կարող են հասնել ուրանի հարստացման մտահոգիչ մակարդակի:

Թեհրանի զինված ուժերի շտաբի պետ Աբդոլրահիմ Մուսավին կիրակի հայտարարել է, որ Թեհրանը համոզված չէ, թե Իսրայելը կպահպանի հրադադարը:

«Մենք չենք սկսել պատերազմը, բայց պատասխանել ենք ագրեսորին ամբողջ ուժով, և քանի որ լուրջ կասկածներ ունենք թշնամու՝ իր պարտավորություններին, այդ թվում նաև հրադադարին, հավատարիմ մնալու հարցում, ապա եթե կրկին հարձակվեն, պատրաստ ենք պատասխանել ուժով»,–ասել է Մուսավին՝ պետական հեռուստատեսության միջոցով:

Իրանը տվել է վնասների վերաբերյալ հակասական գնահատականներ: Գերագույն առաջնորդ Այաթոլլահ Ալի Խամենեին հայտարարել է, որ հարվածները զգալի արդյունք չեն տվել, մինչդեռ արտգործնախարար Աբբաս Արաղչին ասել է, որ հասցվել է «չափազանց և լուրջ» վնաս:

Հունիսի լույս 22-ի գիշերը ԱՄՆ նախագահ Դոնալդ Թրամփը հայտնել է Իրանում երեք միջուկային օբյեկտների՝ Ֆորդոյում, Նաթանզում և Իսֆահանում իրականացված հաջող հարվածի մասին։ Ավելի ուշ նա հայտարարել է, որ այդ օբյեկտները լիովին ոչնչացվել են և այս գործողությունն անվանել է նշանակալի ռազմական հաջողություն։ Իսրայելը հունիսի 13-ից սկսած ամեն օր օդային հարվածներ է հասցրել Իրանի տարածքին՝ նպատակ ունենալով վերացնել իսլամական հանրապետության հրթիռային և միջուկային ծրագիրը։ Այժմ Իրանի և Իսրայելի միջև հրադադար է։