Սիմոնյան. Պետք է լրջորեն քննարկել ՀՀ-ում ռուսական ալիքների հեռարձակումը դադարեցնելու հարցը

PanARMENIAN.Net - Ազգային ժողովի նախագահ Ալեն Սիմոնյանը լրագրողների հետ զրույցում ասել է, որ պետք է լրջորեն քննարկել ՀՀ-ում ռուսական ալիքների հեռարձակումը դադարեցնելու հարցը:

«Այդ մանկուրտների, կապիկների ծրագրերը վաղուց փակված են ՀՀ-ում, իրենց մուտքը ՀՀ փակված է, բայց եթե պետական ալիքներն իրենց թույլ են տալիս խառնվել ՀՀ ներքին գործերին, միգուցե մենք էլ պետք է առնվազն փակենք իրենց մուտքը մեր հանրության բնակարաններ»,- շարունակել է Սիմոնյանը, հայտնում է Sputnik Արմենիան։

Անդրադառնալով ՀՀ-ում վերջին իրադարձությունների, այդ թվում՝ գործարար Սամվել Կարապետյանի կալանավորման վերաբերյալ ՌԴ Պետդումայի պատգամավորների կողմից հնչող արձագանքներին, որ Կարապետյանին ազատազրկելն ազդում է հայ-ռուսական հարաբերությունների վրա՝ Սիմոնյանը հեգնանքով է պատասխանել։

«Երևի իրենց դեգեներատ հաղորդավարների ծրագրերն է նայել ու տպավորություն է եղել, որ իրոք հարվածում է հայ-ռուսական հարաբերություններին, և իրոք` իրենց դեգեներատ հաղորդավարների ելույթները վնասում են հայ-ռուսական հարաբերություններին»,–ասել է նա։

Ներկայումս Հայաստանի հանրային մուլտիպլեքսով հեռարձակվում են Ռուսաստանի «Առաջին ալիքը», «Կուլտուրան» և «RTR-Պլանետան»։