Հուլիսից ԼՂ-ից տեղահանված անչափահասների, հաշմանդամների, թոշակառուների համար 30,000 դրամ կլինի աջակցությունը

3 հուլիսի 2025 - 13:52 AMT

PanARMENIAN.Net - Կառավարության նիստի ժամանակ քննարկվել է Լեռնային Ղարաբաղից տեղահանված քաղաքացիների ֆինանսական աջակցության ընթացիկ կարգավորումները։

Փոխվարչապետ Տիգրան Խաչատրյանը հիշեցրել է․«Մենք արդեն ապրիլ ամսից պետք է վերանայված, ավելի թիրախային և հասցեական աջակցության մեխանիզմին անցնեինք, բայց որոշակիորեն հետաձգեցինք ևս երկու ամսով: 40 հազարական դրամներ ամենամսյա վարձակալության աջակցության ծրագիրը նաև ապրիլ և մայիս ամիսների համար շարունակվեց, հունիսից մեր նոր կարգավորումն է մտել ուժի մեջ»։

Նրա խոսքով, նոր կարգավորումների շրջանակում աջակցությունը տրամադրվում է միայն անչափահասներին, կենսաթոշակային տարիք ունեցողներին և հաշմանդամություն ունեցող անձանց, հայտնում է 1lurer.am-ը։

«Հունիսին կստանան 40 հազար դրամ, արդեն հուլիս ամսից բոլորի համար 30 հազար դրամ կլինի մինչև տարեվերջ: Այսինքն՝ մենք կշարունակենք մինչև տարեվերջ 30-հազարական աջակցությունը անչափահասների, հաշմանդամների և կենսաթոշակային տարիքի անձանց համար», - ընդգծել է փոխվարչապետը։

Ադրբեջանը 2023–ի սեպտեմբերի 19-ին Արցախի դեմ լայնամասշտաբ հարձակում է իրականացրել՝ ամբողջությամբ զանգվածային հրետակոծության տակ առնելով երկիրը։ Արդյունքում մեկ օր անց՝ սեպտեմբերի 20-ին ԱՀ իշխանություններն ընդունել են ռուսական խաղաղապահ առաքելության հրամանատարության առաջարկը կրակի դադարեցման վերաբերյալ՝ համաձայնվելով Բաքվի պայմաններին՝ ՊԲ զինաթափում և Արցախի Հանրապետության լուծարում։ Սեպտեմբերի 24-ից արցախցիների բռնի տեղահանում է սկսվել, 100,000–ից ավելի մարդ է բռնի տեղահանվել Հայաստան: Ըստ որոշ տվյալների, Արցախում մոտ 20 հայ է մնացել։ Սեպտեմբերի 28–ին ԱՀ նախագահ Սամվել Շահրամանյանը հրամանագիր է ստորագրել ԱՀ լուծարման մասին, որը ուժի մեջ է մտել 2024–ի հունվարի 1–ից։