Կոնջորյանը կոչ է արել ՀԷՑ-ի գործունեության քննիչ հանձնաժողով ստեղծել ԱԺ–ում

PanARMENIAN.Net - «Քաղաքացիական պայմանագիր» խմբակցության ղեկավար Հայկ Կոնջորյանը առաջարկել է քննարկել նաև ՀԷՑ-ի գործունեության հետ կապված՝ Ազգային ժողովում քննիչ հանձնաժողով ստեղծելու հարցը:

Նա շեշտել է, որ հանձնաժողովի ձևավորման դեպքում հնարավորություն կլինի վեր հանել բազմաթիվ հանգամանքներ՝ սկսած ՀԷՑ-ի սեփականաշնորհումից՝ ՀՀ երկրորդ նախագահ Ռոբերտ Քոչարյանի նախագահության տարիներից, մինչև հետագա գործառույթները, հայտնում է 1lurer.am-ը։

«Նորից ուզում եմ կոչ անել ՀԷՑ-ի այն աշխատակիցներին, որոնք այս օրերին զբաղված են այնտեղ քաղաքական գործունեությամբ, քաղաքական խարդավանքներով, շատ շուտով ազատվելու են աշխատանքից, երկրորդ՝ այն աշխատակիցները, այն անձինք, որոնք ՀԷՑ-ի աշխատակիցներին ստիպում են մասնակցել տարատեսակ հավաքների, ՀՀ օրենսդրության համաձայն, ընդհուպ ենթարկվելու են քրեական պատասխանատվության: Եվ այն աշխատակիցները, որոնք չեն տրվելու այդ ճնշումներին, նրանք անմիջապես վերականգնվելու են իրենց աշխատանքին և նրանց չվճարված, բաց թողնված աշխատավարձերը վճարվելու են»,- ԱԺ ամբիոնից հայտարարել է Կոնջորյանը։

Նա ընդգծել է, որ իր ասածները հստակ ուղերձ են նրանց, ովքեր փորձում են ՀԷՑ-ում ներգրավվել քաղաքական ճնշումներում։

«Սա ուզում եմ այս ամբիոնից հերթական անգամ կրկնել, որպեսզի կոնկրետ մարդիկ ականջներին օղ անեն»,- նշել է նա։

Նա կոչ արեց ընդդիմությանը «այդքան խորը չմտնել Սամվել Կարապետյանի քսակի մեջ, որովհետև դա որևէ հետևանքի չի հանգեցնելու»:

«ՀՀ տերը Հայաստանի ժողովուրդն է, այդ թվում՝ պետական ռեսուրսների, և քաղաքական գործունեություն իրականացնող ուժերի քաղաքական տերը ևս ՀՀ ժողովուրդն է:

Դուք ի՞նչ տիրոջ եք ծառայում, երբ քանի օր արդեն զբաղված եք կոնկրետ մարդկանց, կոնկրետ շրջանակների, Հայաստանից դուրս կապիտալ կուտակած շրջանակների քաղաքական շահերի պաշտպանությամբ: Ապօրինի գույքի ու թալանի իրական շահառուները եկել են, մեզ մեղադրում են ունեցվածք խլելու մեջ: Կրկնում եմ՝ սա ՀԷՑ-ը խլելու մասին չէ, սա ՀԷՑ-ը իրենց տերերին՝ Հայաստանի ժողովրդին վերադարձնելու մասին է»,- ընդգծեց Կոնջորյանը:

Արձագանքելով ընդդիմադիր պատգամավոր Գառնիկ Դանիելյանի մեղադրանքներին՝ «Քաղաքացիական պայմանագիր» խմբակցության ղեկավարը նրան մեղադրեց «սրբապիղծ տեռորիստների կողքը կանգնելու համար»:

Վարչապետ Նիկոլ Փաշինյանը հունիսի 18-ին՝ մինչ գործարար Սամվել Կարապետյանի կալանավորումը, հայտարարել է, թե եկել է ժամանակը՝ ՀԷՑ-ը պետք է պետականացվի։ Նա նաև նախազգուշացրել է, որ ՀԷՑ-ի այն աշխատակիցները, ովքեր չեն համագործակցի պետության հետ, ազատման կենթարկվեն։ Հունիսի 24-ին նա նշել է, որ պետականացման պլանը արդեն պատրաստ է։