Վերաքննիչը չի փոխել Կարապետյանի խափանման միջոցը

PanARMENIAN.Net - Վերաքննիչ դատարանն անփոփոխ է թողել երկու ամսով կալանավորված գործարար և բարերար Սամվել Կարապետյանի խափանման միջոցը։ Այդ մասին հայտնել են դատական դեպարտամենտից, գրում է Sputnik Արմենիան։

Սամվել Կարապետյանի կալանքի որոշումը հունիսի 19–ին բողոքարկման էր ներկայացրել Վերաքննիչ քրեական դատարան։

Հունիսի 23–ին հայտնի դարձավ, որ Սամվել Կարապետյանի եղբայրը` Կարեն Կարապետյանը, հետ է վերցնում Վերաքննիչ բողոքը, քանի որ այն մակագրվել էր ամենից ցածր վարկանիշ ունեցող դատավոր Արմեն Դանիելյանին։ Ավելի ուշ պարզ դարձավ, որ կատարվել է ամեն ինչ, որպեսզի միայն Արմեն Դանիելյանը քննության առնի Սամվել Կարապետյանի կալանքի վերաբերյալ բողոքը:

Սամվել Կարապետյանի փաստաբան Արմեն Ֆերոյանը նշել էր, որ կալանքի որոշմամբ խախտվել են իր պաշտպանյալի իրավունքները, և այս գործով օգտագործված ներպետական միջոցները չեն համարվել արդյունավետ։

«Կարապետյանի կալանքի որոշմամբ նրա իրավունքների ոտնահարման հարցը ՄԻԵԴ բողոքարկելիս սպառման ենթակա են միայն այն ներպետական միջոցները, որոնք արդյունավետ են, իսկ տվյալ գործով ներպետական միջոցների արդյունավետությունն ամբողջությամբ բացակայում է»,–նշել էր նա։

Փաստաբանը նաև հավելել է, որ արդեն գրեթե ավարտին են հասցվել Մարդու իրավունքների եվրոպական դատարան անհապաղ դիմելու նախապատրաստական գործողությունները։

Հունիսի 18-ին Սամվել Կարապետյանը կալանավորվել է երկու ամսով և տեղափոխվել «Արմավիր» ՔԿՀ` ՀՀ կառավարության լիազորություններին տիրանալnւն ուղղված հրապարակային կոչի համար։

Ի պատասխան Փաշինյանը գրել էր․ «Պոռնկաբարո «հոգևորականներն» ու նրանց պոռնկաբարո «բարեգործներն» ինչո՞ւ են ակտիվացել։ Ոչինչ՝ նորից կպասիվացնենք։ Ընդ որում՝ ընդմիշտ»: Ավելի ուշ նա հավելել է, որ ՀԷՑ–ը պետք է պետականացվի և շատ արագ։