Հայրապետյան․ Շուտով ընդունվելու է կիբեռանվտանգության մասին օրենքը՝ այն կսահմանի «խաղի կանոնները»

PanARMENIAN.Net - Մոտ ապագայում Հայաստանում նախատեսվում է ընդունել կիբեռանվտանգության մասին օրենք, որը նոր չափանիշներ և կանոնակարգեր կսահմանի ինչպես պետական հաստատությունների, այնպես էլ տնտեսական կարևորություն ունեցող ոլորտների համար։ Այս մասին հայտարարել է բարձր տեխնոլոգիական արդյունաբերության նախարար Մխիթար Հայրապետյանը՝ պետական և մասնավոր հատվածի մասնագետների համար կազմակերպված կիբեռանվտանգության հաքաթոնի բացման ժամանակ։

Նախարարն ընդգծել է, որ ռազմավարական նշանակության օբյեկտների և ենթակառուցվածքների արդյունավետ պաշտպանությունը հնարավոր է միայն բարձրորակ մասնագետների միջոցով։ Նրա խոսքով՝ հաքաթոնի անցկացումը հենց այդ նպատակին է ծառայում։ Մասնակիցները, միջազգային փորձագետների առաջնորդությամբ, գործնական առաջադրանքներ են կատարելու՝ հակադրվելով պայմանական կիբեռհարձակումներին, հայտնում է Sputnik Արմենիան։

Ապագա օրենքը, ինչպես նշել է Հայրապետյանը, պետք է սահմանի «խաղի կանոնները» ինչպես ՏՏ-անվտանգության ոլորտի մասնագետների, այնպես էլ պետական և մասնավոր կազմակերպությունների համար, որոնք պարտավոր կլինեն ներգրավել նրանց: Նախարարն ընդգծել է օրենքի ընդունման գործընթացն արագացնելու անհրաժեշտությունը:

«Մենք պետք է պասիվ մոտեցումից, որի դեպքում վերացնում ենք կիբեռհարձակումների հետևանքները, անցնենք պրոակտիվ մոտեցման՝ վերապատրաստենք մասնագետներին և կանխենք պոտենցիալ սպառնալիքները»։

«Կիբեռանվտանգության մասին» օրենքի նախագիծը ներառված է լայնածավալ օրենսդրական փաթեթում, որը նաև նախատեսում է անձնական տվյալների պաշտպանության և պետական միասնական ռեեստրի ստեղծման իրավական կարգավորումներ։