Վանեցյան. Ալիևը ռազմական ծախսերը կրկնակի ավելացնում է, իսկ Փաշինյանն ասում է, որ մեզ բանակ պետք չէ

PanARMENIAN.Net - ԱԱԾ նախկին ղեկավար, «Հայրենիք» կուսակցության նախագահ Արթուր Վանեցյանը «Արցախի կանչը» հուշահամալիրի բացման արարողության ընթացքում, Եռաբլուրում լրագրողների հետ զրույցում ասել է, որ Հայաստանի և Ադրբեջանի ղեկավարների հայտարարությունները կտրուկ հակասում են իրար։

«Ալիևը հայտարարում է, որ ռազմական ծախսերը կրկնակի ավելացնում է, իսկ Նիկոլ Փաշինյանը հայտարարում է, որ մեզ բանակ պետք չէ»,- նշել է Վանեցյանը՝ ընդգծելով սպառնալիքների աճին ոչ համարժեք վերաբերմունքը կառավարության կողմից, հայտնում է Panorama.am-ը։

Նա շարունակել է թվարկել Հայաստանի ու Ադրբեջանի առաջնորդների կողմից հնչեցրած ու միմյանց հակասող հայտարարությունները։

«Ալիևը հայտարարում է, որ իրենք իրենց պայմաններն են թելադրել Հայաստանին «խաղաղության» պայմանագիրը ստորագրելու հարցում, Նիկոլ Փաշինյանը բացականչում է ինքնիշխանություն, իրավազորություն... Գիտե՞ք, մարդկանց ինչքան կարելի է խաբել։ Անհնար է մարդկանց խաբել, խաբել, անվերջ խաբել»,–ասել է նա։

Օգոստոսի 8–ին Սպիտակ տանը կայացած ՀՀ վարչապետ Նիկոլ Փաշինյանի, ԱՄՆ նախագահ Դոնալդ Թրամփի և Ադրբեջանի նախագահ Իլհամ Ալիևի եռակողմ հանդիպմանը ստորագրվել է համատեղ Հռչակագիր` Վաշինգտոնում տեղի ունեցած հանդիպման արդյունքների մասին:

Վաշինգտոնում Հայաստանի ԱԳ նախարար Արարատ Միրզոյանը և Ադրբեջանի ԱԳ նախարար Ջեյհուն Բայրամովը Հայաստանի, Ադրբեջանի և ԱՄՆ ղեկավարների ներկայությամբ նախաստորագրել են «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։