Ավինյան․ Մետրոյի «Երիտասարդական» կայարանից դեպի Նոր Նորք ճոպանուղի կկառուցվի

PanARMENIAN.Net - Երևանի քաղաքապետ Տիգրան Ավինյանը հայտնել է, որ քննարկում են մետրոյի «Երիտասարդական» կայարանից դեպի Նոր Նորք ճոպանուղու կառուցման հարցը. մրցույթը հայտարարվել է, հայտնում է Radar Armenia-ն։

«Հիմա ֆինանսների նախարարի հայացքն եմ տեսնում իմ ուղղությամբ, բայց մենք կփորձենք հիմնականում մեր միջոցներով այս ծրագիրն իրականացնել»,-ասել է նա։

1967 թվականից Երևանում գործում էր կենտրոնը Հին Նորքի հետ կապող ճոպանուղին, որը վթարվեց 2004 թվականին և չի գործում մինչ օրս։ Ճոպանուղին օրական տեղափոխել է մոտ 500 ուղևոր։ Ներկայումս շենքը լքված և անխնամ վիճակում է։

Դեռևս 2018–ին հայտարարվել էր, որ Երևանում նախատեսվում է նոր ճոպանուղու կառուցում: Խոսվում էր 3 տարբերակի մասին՝ Կոմիտասի անվան պուրակ, միջանկյալ՝ «Մայր Հայաստան» արձան (Հաղթանակ զբոսայգի), Քանաքեռ-Զեյթուն, երկրորդը՝ Մաշտոցի պողոտա՝ Գլխավոր պողոտայի հատված,միջանկյալ՝ Հալաբյան փողոց` Թումանյանի այգի, 16-րդ թաղամաս՝ 2-րդ շղթա, երրորդը՝ Սբ. Գրիգոր Լուսավորիչ եկեղեցու հարևանությամբ (Օղակաձև զբոսայգի), միջանկյալ՝ Նորք Մարաշ վարչական շրջան, Նոր-Նորք 2-րդ զանգված` Գայի պողոտա: Ասվել էր, որ ծրագիրը կիրականացվի 3 տարում և կպահանջի 20 մլն դոլարի ներդրում։