ԵԱԶԲ-ն ՀՀ-ում կանխատեսում է սպառողական գների աճի պահպանում

PanARMENIAN.Net - Եվրասիական զարգացման բանկը կանխատեսում է, որ Հայաստանում սպառողական գների աճը կշարունակի պահպանվել Հայաստանի Կենտրոնական բանկի գնահատականների սահմաններում։ Այս մասին նշված է բանկի հրապարակած շաբաթական մակրոտնտեսական զեկույցում։

Ըստ զեկույցի՝ 2025 թվականի սեպտեմբերին Հայաստանում արձանագրվել է 3.7 տոկոս գնաճ, մինչդեռ նախորդ՝ օգոստոս ամսին այն կազմել է 3.6 տոկոս։ Նկատվել է, որ հատկապես սննդամթերքի գների աճն է արագացել՝ սեպտեմբերին կազմելով 5.8 տոկոս՝ համեմատած օգոստոսյան 4.9 տոկոսի։ Այս զարգացումն, ըստ զեկույցի, պայմանավորված է համաշխարհային շուկաներում պարենային ապրանքների գների փոփոխություններով, գրում է Sputnik Արմենիան։

Միևնույն ժամանակ, ծառայությունների ոլորտում գնաճի ցուցանիշը նվազել է՝ կազմելով 2.8 տոկոս՝ մեկ ամիս առաջվա 3.2 տոկոսի փոխարեն։ Նմանատիպ դինամիկա է գրանցվել նաև ոչ պարենային ապրանքների սեգմենտում, որտեղ գնաճը կազմել է 0.9 տոկոս՝ ի տարբերություն նախորդ ամսվա 1.1 տոկոսի։

«Մենք ընթացիկ տարում կանխատեսում ենք սպառողական գների աճի պահպանում ՀՀ ԿԲ նպատակային միջակայքում (3±1 տոկոս)», – ասված է զեկույցում։

Ավելի վաղ բանկը հրապարակել էր նաև Հայաստանի տնտեսական աճի վերաբերյալ իր կանխատեսումները։ Ըստ բանկի մակրոտնտեսական գնահատականների՝ 2025 թվականին Հայաստանի ՀՆԱ-ն կաճի 5.5 տոկոսով, 2026 թվականին՝ 5.3 տոկոսով, իսկ 2027-ին՝ 5.0 տոկոսով։