Փաստաբանների պալատ․ Կոչուբաևի նկատմամբ դատավարական հարկադրանքի միջոցներն անհամաչափ են

PanARMENIAN.Net - Փաստաբանների իրավունքների պաշտպանության հանձնաժողովն, անդրադառնալով փաստաբան Ալեքսանդր Կոչուբաևի դեմ հարուցված քրեական գործին ու նրա կալանավորմանը, հայտարարել է, որ նրա նկատմամբ դատավարական հարկադրանքի միջոցներն անհամաչափ են:

«Հանձնաժողովը, նախ, խիստ մտահոգիչ է համարում տեղեկատվության հրապարակային աղբյուրներում առկա տվյալները՝ փաստաբան Ալեքսանդր Կոչուբաևին վարույթն իրականացնող մարմին հարկադրաբար ներկայացնելու գործողության ժամանակ կիրառված անհամաչափ ուժի վերաբերյալ:

Հանձնաժողովը հիշեցնում է՝ Փաստաբանի հեղինակությանը չվնասելու հարցում առանձնակի հոգատարությունն անհրաժեշտ պայման է անձանց իրավունքների պաշտպանվածության պատշաճ միջավայր ապահովելու համար:

Եվրոպական դատարանի կայուն դիրքորոշման համաձայն՝

.վիրավորանքի կամ քննադատության համար ազատությունից զրկումն անթույլատրելի է,

.նման ներգործությունը համարվում է անհամաչափ և ոչ անհրաժեշտ միջոց,

.պետությունները պարտավոր են ընտրել միայն քաղաքացիական կամ ոչ քրեական պատասխանատվության ձևեր նման դեպքերում»,–ասվում է հայտարարության մեջ։

Նշվում է, որ այս մոտեցումները կիրառելով Ալեքսանդր Կոչուբաևի դեպքի համատեքստում՝ հանձնաժողովը հստակ արձանագրել է հետևյալը.

. հաշվի առնելով նրան վերագրվող արարքները և նրա՝ որպես փաստաբանի կարգավիճակը՝ կիրառված դատավարական հարկադրանքի միջոցներն ու միջոցառումները համարվել են ոչ համաչափ և անհարկի։

Հաշվի առնելով գործի առանձնահատկությունները՝ Կոչուբաևին պատկանող փաստաբանական գրասենյակի, մեքենայի ու բնակարանի խուզարկությունները գնահատվել են որպես անհամաչափ և նույնիսկ վիրավորական միջամտություն՝ Մարդու իրավունքների եվրոպական կոնվենցիայի 8-րդ հոդվածի տեսանկյունից։

Հանձնաժողովի գնահատմամբ՝ «իշխանությունների ընթացիկ գործելաոճը հակասում է ժողովրդավարական պետության սկզբունքներին»։

Հանձնաժողովը խստագույնս դատապարտել է արտահայտված խոսքի կապակցությամբ փաստաբանի նկատմամբ իրականացվող ցանկացած հետապնդում, առավել ևս՝ իրավունքների սահմանափակման այնպիսի բացառիկ միջոցի կիրառում, ինչպիսին կալանավորումն է։

«Հանձնաժողովը հորդորում է վարույթի հանրային մասնակիցներից և ազատությունից զրկելու թույլատրելիությունը քննարկող դատարաններից փաստաբանի նկատմամբ հարկադրանքի միջոցներ ընտրելիս կամ կիրառելիս հաշվի առնել նրա՝ որպես փաստաբանի կարգավիճակից բխող առանձնահատկությունները,

պահանջում է իրավասու մարմիններին քննության ենթարկել Ալեքսանդր Կոչուբաևին վարույթն իրականացնող մարմին հարկադրաբար ներկայացնելու գործողության ժամանակ անհամաչափ ուժի կիրառման վերաբերյալ տեղեկությունները և իշխանազանցություն թույլ տված պաշտոնատար անձանց ենթարկել համարժեք պատասխանատվության,

արձանագրում է որ փաստաբան Ալեքսանդր Կոչուբաևին պատկանող հեռախոսը և դյուրակիր համակարգիչը ողջամտորեն կարող են պարունակել իր վստահորդներին վերաբերող փաստաբանական գաղտնիք հանդիսացող տեղեկություններ, ուստի գտնվում են «Փաստաբանության մասին» ՀՀ օրենքի 21-րդ հոդվածով երաշխավորված պաշտպանության ներքո,

պահանջում է քրեական վարույթն իրականացնող մարմնին զերծ մնալ փաստաբանական գաղտնիքի նկատմամբ ոտնձգություն ենթադրող ցանկացած գործողությունից, այդ թվում՝ Ալեքսանդր Կոչուբաևի հեռախոսի և դյուրակիր համակարգչի պարունակությունը բացահայտելուն ուղղված որևէ դատավարական գործողություն կատարելուց, և վերադարձնել դրանք»,–ասվում է հայտարարության մեջ։

Փաստաբան Ալեքսանդր Կոչուբաևը կալանավորվել է երկու ամսով։ Քննչական կոմիտեն հաղորդել է, թե քրեական հետապնդում է հարուցվել դատավորի, դատախազի, քննիչի մասին արատավորող տեղեկություն հրապարակելու համար։

Կոչուբաևը ֆեյսբուքյան էջի վերջին գրառմամբ կոշտ բառերով քննադատել էր Մկրտիչ սրբազանի կալանավորումը: Նախորդ շաբաթ էլ քննադատել էր Տավուշի թեմի նախկին առաջնորդի գործով իրավապահներին: