Տեր Եսայի. Կաթողիկոսի հրաժարականի և Արշակ սրբազանի կարգալուծման մասին լուրերը կեղծ են

PanARMENIAN.Net - Մայր աթոռի տեղեկատվական համակարգի ղեկավար տեր Եսայի քահանա Արթենյանը հայտնել է, որ Ամենայն Հայոց կաթողիկոս Գարեգին Երկրորդի հրաժարականի, ինչպես նաև Արշակ արքեպիսկոպոս Խաչատրյանի կարգալուծման պահանջի մասին լուրերն ապատեղեկատվություն են։, տեղեկացնում է Sputnik Արմենիան։

«Մամուլում Վեհափառ հայրապետի հրաժարականի և Արշակ արք. Խաչատրյանի կագալուծության պահանջի մասին տեղ գտած տեղեկատվությունը իրականությանը չի համապատասխանում և կեղծ է: Արշակ արքեպիսկոպոսին վերագրվող անպարկեշտ բովանդակությամբ տեսանյութերի հետ կապված հարցի ուսումնասիրության և եզրակացություն ներկայացնելու համար Վեհափառ հայրապետը, հաշվի առնելով ներկայացված առաջարկները, ստեղծել է հանձնախումբ»,- նշել է Տեր Եսային։

Հոկտեմբերի 25-ին «Հայկական Վիկիլիկս» անունով նոր ստեղծված տելեգրամյան ալիքը հրապարակել է ինտիմ բնույթի տեսագրություն՝ այն վերագրելով Մայր աթոռի դիվանապետ Արշակ արքեպիսկոպոս Խաչատրյանին։ Վերջինս արձագանքել է՝ նշելով, որ նույնիսկ գերլարված ջանքերի դեպքում ի վիճակի չէ զբաղվել հորինված և զրպարտչական նյութերի հերքմամբ՝ նախընտրելով անտեսման տարբերակը։

Հոկտեմբերի 27-ին ՀՀ դատախազությունը ընթացք է տվել «Իրազեկ քաղաքացիների միավորման» ներկայացրած հաղորդմանը՝ կապված Արշակ սրբազանին վերագրվող տեսագրության հետ։ ՀՀ քննչական կոմիտեն մեկնարկել է վարույթ՝ անձնական կամ ընտանեկան կյանքի գաղտնիության խախտման հատկանիշներով, կիրառելով տեղեկության գաղտնի հավաքման համար նախատեսված հատուկ տեխնիկական միջոց։