Վարդանյանի դատաքննությունն ավարտվել է․ Նրա միջնորդությունները մերժվել են

PanARMENIAN.Net - Բաքվում ավարտվել է հայտնի գործարար և բարերար, Արցախի նախկին պետնախարար Ռուբեն Վարդանյանի դեմ շինծու գործերով դատաքննությունը։ Դեկտեմբերի 16–ի նիստում կողմերը հայտնել են, որ չեն առարկում դատաքննության ավարտի և ելույթների փուլի մեկնարկի դեմ։

Դատական նիստի ընթացքում Վարդանյանի փաստաբան Էմիլ Բաբիշևը ներկայացրել է 2 միջնորություն, որոնք մերժվել են, հայտնում է Minval.az-ը։

Նա հիշեցրել է, որ սեպտեմբերի 16‑ի նիստում իր պաշտպանյալը մի շարք միջնորդություններ էր ներկայացրել, մեկը վերաբերում էր Կարմիր Խաչի միջազգային կոմիտեի (ՄԿԽՄԿ) ներկայացուցչի ներգրավմանը որպես վկա:

Փաստաբանը նշել է, որ պաշտպանությունը համարում է նման մասնակցությունը անհրաժեշտ, քանի որ ԿԽՄԿ ներկայացուցիչները բազմիցս այցելել են նրա կալանքի վայր, հանդիպել Վարդանյանին, օգնել սնունդ և հագուստ ապահովելու հարցում և ընտանիքի հետ կապ պահելու հարցում: Վարդանյանը հաստատել է, որ աջակցում է այս միջնորդությանը։

Պաշտպանության առաջարկը, ըստ դատախազի, չի կարող պարզել անձի կարգավիճակը և չունի ապացուցողական արժեք, ուստի մեղադրող կողմը խնդրել է մերժել հայցը: Դատարանը, լսելով կողմերին, մերժել է հայցը՝ նշելով, որ այն չի վերաբերում գործին եւ ապացուցողական արժեք չունի:

Հետո փաստաբան Բաբիշևը ներկայացրել է երկրորդ միջնորդությունը՝ նշելով, որ նյութերում կան գրասենյակի և բնակարանի տեսագրություններ ու արձանագրություններ, և առաջարկվում է հարցաքննել քննիչին՝ որպես վկա, պարզելու համար դրանք:

Այս միջնորդությունը ևս մերժվել է՝ նշելով, որ քննիչը չի կարող հարցաքննվել որպես վկա:

Հաջորդ նիստը նշանակվել է դեկտեմբերի 18‑ին:

Ռուբեն Վարդանյանին Բաքուն մեղադրում է Ադրբեջանի դեմ պատերազմ ծրագրելու, նախապատրաստելու և իրագործելու, ահաբեկչության ֆինանսավորման և այլ ծանր հանցագործությունների մեջ, թեև Վարդանյանը երբևէ չի մասնակցել մարտական գործողությունների, նույնիսկ չի եղել Արցախում պատերազմի ժամանակ։