Դատարանը վարույթ է ընդունել ՀԱԵ հայցերը կարգալույծ քահանայի դեմ

PanARMENIAN.Net - Վարույթ է ընդունվել ՀԱԵ ներկայացրած երկու հայցադիմումը ընդդեմ կարգալույծ հռչակված նախկին քահանա Արամայիս Թախմազյանի (նախկինում՝ Տեր Թադե) դեմ, հայտնում է Panorama.am-ը:

Առաջին հայցը դատարան է մուտքագրվել փետրվարի 10-ին։ Հաջորդ օրը այն մակագրվել է Արագածոտնի մարզի առաջին ատյանի ընդհանուր իրավասության դատարանի դատավոր Զարուհի Մկրտչյանին, իսկ փետրվարի 18-ին դատավորը որոշել է այն ընդունել վարույթ։

ՀԱԵ-ն դատարանին դիմել է՝ պահանջելով պարտավորեցնել Արամայիս Թախմազյանին վերադարձնել Արագածոտնի մարզի Թալին քաղաքի Սուրբ Աստվածածին եկեղեցին, ներառյալ՝ բանալիները։ Բացի այդ, պահանջվել է արգելել Թախմազյանին մուտք գործել Սբ Աստվածածին եկեղեցու Սուրբ Խորան, ավանդատուն և ատյան հատվածներ։

Հայցով նաև առաջադրվել է պահանջ հօգուտ ՀԱԵ-ի բռնագանձել դատական ծախսերը, այդ թվում՝ նախապես վճարված պետական տուրքի գումարը։

Նույն օրը ներկայացվել է ևս մեկ հայց նախկին քահանայի դեմ։ Եկեղեցին դատարանից խնդրել է պարտավորեցնել Թախմազյանին և Հռիփսիմե Խաչատրյանին վերադարձնել եկեղեցուն պատկանող Արագածոտնի մարզի Թալին քաղաքի Մյասնիկյան 3-րդ շենքի 5-րդ բնակարանը՝ միաժամանակ վտարելով պատասխանողներին նշված բնակարանից։

Բացի այդ, ՀԱԵ-ն խնդրել է պատասխանողներից հօգուտ եկեղեցու բռնագանձել դատական ծախսերը, ներառյալ՝ նախապես վճարված պետական տուրքի գումարը։

Այս հայցադիմումն ևս մակագրվել է նույն դատավորին, որը որոշում է կայացրել այն ընդունել վարույթ։

Մինչդեռ Արմավիրի մարզի ընդհանուր իրավասության դատարանի դատավոր Սիմո Աբովյանը վարույթ է ընդունել կարգալույծ հռչակված Տեր Արամ քահանա Ասատրյանի՝ ընդդեմ Հայ Առաքելական եկեղեցու ներկայացրած հայցադիմումը։ Վարույթ է ընդունվել նաև Տեր Թադե քահանա Թախմազյանի՝ Արամայիս Թախմազյանի հայցը, որի վերաբերյալ որոշումը կայացրել է դատավոր Հովհաննես Մելքոնյանը։

Դատարանը եկեղեցուն պարտավորեցրել է ապահովել կարգալույծ քահանաների պաշտոնավարումը: