ՍԴ-ն սահմանադրական է համարել ՀԷՑ–ի լիցենզիայից «Տաշիր կապիտալին» զրկելու որոշումը

PanARMENIAN.Net - ՀՀ Սահմանադրական դատարանը մերժել է Ազգային ժողովի ընդդիմադիր պատգամավորների դիմումը և փաստացի օրինական համարել «Տաշիր կապիտալին» ՀԷՑ–ի լիցենզիայից զրկելու որոշումը:

Որոշումը վերջնական է և ուժի մեջ է մտնում հրապարակման պահից:

Սահմանադրական դատարանը պատգամավորների ընդհանուր թվի առնվազն մեկ հինգերորդի դիմումի հիման վրա ՍԴ–ն քննության է առել «Էներգետիկայի մասին» օրենքի 17-րդ հոդվածի «գ» կետը, 27-րդ հոդվածի 2.1-ին մասը, 52.1-ին հոդվածի 1-3-րդ մասերը, ինչպես նաև «Հանրային ծառայությունները կարգավորող մարմնի մասին» օրենքի 36-րդ հոդվածի 9-րդ մասի՝ Սահմանադրությանը համապատասխանելու հարցը։

Դատարանը եզրակացրել է, որ վիճարկված բոլոր դրույթները համապատասխանել են ՀՀ հիմնական օրենքին՝ Սահմանադրությանը։

Գործի որոշ հատվածներով վարույթը կարճվել է։ Գործի քննությունն իրականացվել է գրավոր ընթացակարգով։

Սահմանադրական դատարանի ամբողջական որոշումը կհրապարակվի եռօրյա ժամկետում։

ԱԺ-ն հուլիսի 3–ին ընդունել է «Հանրային ծառայությունները կարգավորող մարմնի մասին» և «Էներգետիկայի մասին» օրենքներում նախատեսված փոփոխությունների և լրացումների փաթեթը (այլ կերպ ասած՝ ՀԷՑ-ի պետականացման նախագիծը)։

Ավելի վաղ՝ հունիսի 18–ին, ՀՀ վարչապետ Նիկոլ Փաշինյանը գործարար, ՀԷՑ–ի սեփականատեր Սամվել Կարապետյանի կալանավորումից հետո հայտարարել է, որ հասունացել է պահը, երբ ՀԷՑ-ը պետք է ազգայնացվի: Հուլիսի 18-ին հայտնի է դարձավ, որ ՀԾԿՀ–ն պետական վերահսկողության ծառայության պետի պաշտոնից ազատված Ռոմանոս Պետրոսյանը նշանակել է ընկերության ժամանակավոր կառավարիչ, իսկ ՀԷՑ-ի նկատմամբ վարույթ է հարուցվել: