Միրզոյան․ Մեծ չափազանցություն կլինի ասել, թե ՀՀ և Ադրբեջանի միջև բոլոր հարցերը հարթված են

PanARMENIAN.Net - Մեծ չափազանցություն կլինի ասել, թե ՀՀ և Ադրբեջանի միջև բոլոր հարցերը հարթված են և ամեն ինչ անամպ է, հայտարարել է Արարատ Միրզոյանը ԱԺ-ում ելույթի ընթացքում:

Նա նշել է, որ բոլոր ենթակառուցվածքները, որոնք կապ են հաստատելու Ադրբեջանի հետ, կառուցվելու, գործարկվելու կամ վերագործարկվելու են Հայաստանի տարածքում և գործելու են բացառապես ՀՀ լիարժեք իրավազորության ներքո, հայտնում է Aysor.am-ը:

«Որքան էլ խոսենք տարանցիկ փոխադրումների մասին, մշտապես հարց կա, թե որոնք են այն երաշխիքները, որոնք պետք է երաշխավորեն Հայաստանի և Ադրբեջանի միջև խաղաղությունը։ Ես միշտ հիշում եմ բազմաթիվ խաղաղություններ, որոնք գրված երաշխավորների խումբ են ունեցել և չեն գործել։ Համոզված եմ, որո բոլոր իրական խաղաղությունները խաղաղություն են և մնում են այնքանով, որքանով դա շահավետ է կողմերի համար, ոչ թե պայմանական երաշխավորների։ Քանի դեռ մեր խաղաղությունը շահավետ կլինի Հայաստանի և Ադրբեջանի համար, այդ խաղաղությունը կշարոնակի գործել»,-ասել է Արարատ Միրզոյանը։

Օգոստոսի 8–ին Սպիտակ տանը կայացած ՀՀ վարչապետ Նիկոլ Փաշինյանի, ԱՄՆ նախագահ Դոնալդ Թրամփի և Ադրբեջանի նախագահ Իլհամ Ալիևի եռակողմ հանդիպմանը ստորագրվել է համատեղ Հռչակագիր` Վաշինգտոնում տեղի ունեցած հանդիպման արդյունքների մասին:

Վաշինգտոնում Հայաստանի ԱԳ նախարար Արարատ Միրզոյանը և Ադրբեջանի ԱԳ նախարար Ջեյհուն Բայրամովը Հայաստանի, Ադրբեջանի և ԱՄՆ ղեկավարների ներկայությամբ նախաստորագրել են «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։