Ալեքսանյան․ Վերջին տարիներին 20-25,000 սփյուռքահայ դարձել է ՀՀ քաղաքացի

PanARMENIAN.Net - Վերջին 3-4 տարիների ընթացքում մոտ 20-25 հազար սփյուռքահայ ստացել է ՀՀ քաղաքացիություն, որոնց մեծ մասը տեղափոխվել է Հայաստան, հայտարարել է Սփյուռքի գործերի գլխավոր հանձնակատարի գրասենյակի հայրենադարձների ինտեգրման վարչության պետ Հովհաննես Ալեքսանյանը:

Նա հայտնել է, որ աշխարհում հայկական համայնքները տարածված են ավելի քան 100 երկրում և ձևավորվել են տարբեր ժամանակահատվածներում՝ ունենալով կազմակերպվածության տարբեր աստիճան, հայտնում է 1lurer.am-ը:

«Այս պահի դրությամբ մենք ունենք 200,000-ից ավելի երկքաղաքացիներ, որոնք ՀՀ քաղաքացիություն ձեռք են բերել վերջին 10-15 տարիների ընթացքում»,- ասել է նա։

Ալեքսանյանը նշել է, որ հայրենադարձություն արձանագրվել է մոտ 45 երկրից։ Առաջատար են Ռուսաստանից ժամանած հայերը, ինչպես նաև Մերձավոր Արևելքից՝ մասնավորապես Լիբանանից և Սիրիայից եկած հայրենակիցները։

Նա հավելել է, որ խոշոր հայկական համայնքներ գործում են Ռուսաստանում՝ մոտ 2.5-3 միլիոն մարդ, ԱՄՆ-ում՝ մոտ 1.5 միլիոն, իսկ Ֆրանսիայում՝ 700-800 հազար։