Սաղաթելյան․ ՀՀ-ն Բաքվի վիլայեթը չէ, որ պահանջի պատժել Ջահերով երթի ժամանակ ակցիայի մասնակիցներին

25 ապրիլի 2026 - 11:34 AMT

PanARMENIAN.Net - Հայաստանն Ադրբեջանի վիլայեթը չէ, որտեղ Բաքուն պետք է դատավճիռներ թելադրի, հայտարարել է «Հայաստան» խմբակցության պատգամավոր, ՀՅԴ ԳՄ ներկայացուցիչ Իշխան Սաղաթելյանը՝ անդրադառնալով Ադրբեջանի ԱԳՆ հայտարարությանը, որով ՀՀ-ից պահանջվում է «պատասխանտավության ենթարկել Ջահերով երթի ժամանակ Թուրքիայի դրոշը հրկիզողներին»:

Նա հավելել է, որ Ադրբեջանի ԱԳՆ-ն իրեն թույլ է տալիս բացահայտ միջամտել մեր երկրի ներքին գործերին և պահանջել պատասխանատվության ենթարկել ՀՀ քաղաքացիներին՝ Ջահերով երթի ժամանակ տեղի ունեցած ակցիայի համար:

«Հասկանալի է, որ Բաքվի երազանքների կառավարիչն այժմ ՀՀ-ում իշխանության է և թշնամու հետ զուգահեռ դատապարտում է սեփական երկրում անցկացվող ազգային ակցիաները։ Բայց անգամ այս պայմաններում սանձարձակությունն ու լկտիությունը պետք է չափ ունենան։

Միայն պատկերացնել կարելի է, թե ինչ աղետալի մակարդակում է գտնվում Հայաստանի ինքնիշխանությունը, երբ հարևան ագրեսոր պետությունն ԱԳՆ մակարդակով հրահանգներ է տալիս ՀՀ պետական համակարգին։ Սա ուղղակի ապացույցն է այն բանի, որ Բաքուն Հայաստանն այլևս չի դիտարկում որպես ինքնուրույն սուբյեկտ։

Հասկանալի է, որ Ադրբեջանի համար Ցեղասպանության ցանկացած հիշատակում տրավմատիկ է, քանի որ այն հայելու պես հիշեցնում է իրենց իսկ նմանատիպ հանցանքները։ Սակայն Թուրքիայի հետ այն աստիճան նույնանալը, որ ստանձնեն նաև Հայոց ցեղասպանության պատասխանատվությունը՝ պահանջելով պատժել ոգեկոչման ակցիայի մասնակիցներին, չափազանց է անգամ Ադրբեջանի նման պետության համար։

Սա այլևս միայն դրոշի հարց չէ։ Սա հարց է այն մասին, թե ով է որոշում մեր երկրում՝ ինչն է թույլատրելի և ինչը՝ ոչ։

Բայց Բաքվի և Անկարայի որոշումները Նիկոլի ռեժիմի համար է, ոչ երբեք մեր ժողովրդի և ազգային ուժերի»,-գրել է նա:

Ադրբեջանի ԱԳՆ-ն հայտարարել է, թե «ՀՀ կառավարությունը պետք է ժամանակին կանխեր» Թուրքիայի դրոշի այրումը Ջահերով երթի ժամանակ, և անվտանգության համապատասխան միջոցներ ձեռնարկեր: «Անթույլատրելի է նման ակցիաներն արդարացնել ժողովրդավարական նորմերի, խոսքի ազատության վրա հղումներով»,-ասվում է հայտարարության մեջ: Բաքուն կոչ է արել ՀՀ իշխանություններին պատասխանտավության ենթարկել «միջադեպին առնչություն ունեցող անձանց»: