ԱՆ․ Հրաժարվեք վեյփից, ծխախոտից և նիկոտինային այլ արտադրանքից՝ օգտագործումը լուրջ ռիսկեր է պարունակում

PanARMENIAN.Net - Ծխախոտի և նիկոտինային արտադրանքների օգտագործումը լուրջ ռիսկեր են պարունակում առողջության համար՝ առաջացնելով կախվածություն, ազդում սրտանոթային, շնչառական և այլ համակարգերի վրա, հայտնում է առողջապահության նախարարությունը:

«Հրաժարվե՛ք վեյփից, ծխախոտից և նիկոտինային այլ արտադրանքից»,-ասվում է հաղորդագրության մեջ:

Նիկոտինային կախվածության հնարավոր նշաններ են՝

• ծխելու կամ վեյփ օգտագործելու անհրաժեշտություն արթնանալուց կարճ ժամանակ անց,
• կենտրոնանալու դժվարություն նիկոտինի բացակայության պայմաններում,
• նիկոտինի օգտագործում սթրեսային իրավիճակներում:

Նիկոտինի բացակայության դեպքում կարող են առաջանալ՝

• դյուրագրգռություն, անհանգստություն,
• կենտրոնացման դժվարություն,
• քնի խանգարումներ,
• գլխացավ,
• կրկին ծխելու ուժեղ ցանկություն:

Այս ախտանիշները կարող են լինել ինտենսիվ, սակայն ունեն ժամանակավոր բնույթ և աստիճանաբար նվազում են։

«Երբ փորձում եք հրաժարվել նիկոտինից, կարող են օգնել հետևյալ քայլեր`

• փորձեք մի քանի րոպեով հետաձգել ծխելու ցանկությունը․ հաճախ այն աստիճանաբար թուլանում է,
• կիրառեք շնչառական վարժություններ. կատարեք 8–10 խորը շունչ՝ օրգանիզմը հանգստացնելու և լարվածությունը նվազեցնելու նպատակով,
• զբաղվեք թեթև ֆիզիկական ակտիվությամբ (քայլք, վազք, նույնիսկ կարճ զբոսանք),
• փորձեք շեղել ուշադրությունը՝ ընթերցանությամբ, երաժշտություն լսելով կամ ընկերների հետ զրուցելով,
• օգտագործեք առողջ խորտիկներ (օրինակ՝ միրգ),
• ձեր որոշման մասին խոսեք ընտանիքի անդամների կամ ընկերների հետ․ աջակցությունը կարևոր է։
• հեռացրեք ծխելը հիշեցնող իրերը և խթանիչ գործոնները:

Եթե զգում եք, որ դժվարանում եք ինքնուրույն դադարեցնել ծխախոտի օգտագործումը`

Զանգահարե՛ք ծխելը դադարեցնելու ԹԵԺ ԳԻԾ` 060 44 00 01:

Խորհրդատվությունն անվճար է և գաղտնի։

Նիկոտինից հրաժարվելը կարևոր ներդրում է Ձեր և Ձեր շրջապատի առողջության մեջ»,- ասվում է հաղորդագրությունում։