Իրանում պահանջում են Ահմադինեժադի մահը

PanARMENIAN.Net - Իրանի նախագահ Մահմուդ Ահմադինեժադի հակառակորդները կրկին դուրս են եկել Թեհրանի փողոցներ: Հարյուրավոր ընդդիմադիրներ վանկարկում են` «Մահ բռնապետին»: Ոստիկանությունը դեռեւս չի միջամտում իրադարձություններին:



Երկու օր առաջ Ահմադինեժադը երկրորդ անգամ ստանձնեց իր պարտականությունները Իսլամական հանրապետության ղեկավարի պաշտոնում: Այդ պաշտոնում նրան հաստատեց Իրանի հոգեւոր առաջնորդ այաթոլլա Ալի Համենեին: Ընդդիմությունը ի սկզբանե վիճարկում էր ընտրությունների արդյունքները:



Մարդիկ Վանակ զբոսայգում են, կարգախոսներ են վանկարկում: «Այստեղ են նաեւ հարյուրավոր ոստիկաններ, որոնք պահպանում են հասարակական կարգը»,-հաղորդում է ՌԻԱ Նովոստի-ն:



Օգոստոսի 5-ին տեղի ունեցավ նախագահի երդմնակալության արարողությունը խորհրդարանում: Հունիսի 12-ին տեղի ունեցած նախագահական ընտրություններից հետո, տանուլ տված ընդդիմադիր Միր Հոսեյն Մուսավիի կողմնակիցները մեղադրեցին իշխանություններին արդյունքները կեղծելու մեջ:



Ձայների մասնակի վերահաշվարկը, որ անցկացրեց Իրանի Դիտորդների խորհուրդը, չազդեց ընտրությունների վերջնական արդյունքի վրա` հաղթող ճանաչվեց Ահմադինեժադը:



ԱՄՆ նախագահ Բարաք Օբաման, ինչպես նաեւ Մեծ Բրիտանիայի, Գերմանիայի ու Ֆրանսիայի նախագահները չեն շնորհավորել Ահմադինեժադին: