ՖԻԴԵ-ի Գրան-պրի. Առաջնորդների եռյակն անփոփոխ է մնացել

PanARMENIAN.Net - Ավարտվել է Հայաստանի Ջերմուկ առողջարանային քաղաքում ընթացքում ՖԻԴԵ-ի Գրան-պրիի հինգերորդ շրջանի 10-րդ փուլը: Ուշագրավ է, որ բացի մրցաշարի առաջնորդներ Պետեր Լեկոյի, Վասիլի Իվանչուկի եւ Ռուստամ Կասիմջանովի պարտիաներից, բոլոր մնացածն արդյունավետ են եղել:



Սակայն, չնայած առաջնորդների ոչ ոքիին եւ Դմիտրի Յակովենկոյի նկատմամբ Լեւոն Արոնյանի հաղթանակին, հայ գրոսմայստերը 6 միավորով ռուս շախմատիստ Եվգենի Ալեքսեեւի հետ կիսում է 4-5-րդ տեղերը` Լեկոյից, Իվանչուկից եւ Կասիմջանովից ետ մնալով կես միավորով:



Նշենք, որ Լեկոն ոչ ոքի է խաղացել մյուս հայ գրոսմայստեր Վլադիմիր Հակոբյանի հետ, որի համար այդպիսի արդյունքն արդեն ութերորդն է:



Օգոստոսի 21-ին 11-րդ փուլում միեւնույն խաղատախտակի շուրջ կնստեն Լեւոն Արոնյանն ու Վլադիմիր Հակոբյան: Իսկ Պետեր Լեկոն ուժերը կչափի Ռուստամ Կասիմջանովի հետ: Իսկ վերջին երկու փուլում Արոնյանը սկզբում կխաղա առանց պարտությունների խաղացող հունգարացու, այնուհետեւ` մրցաշարային աղյուսակը եզրափակող ռուս շախմատիստ Էռնեստո Ինարկիեւի հետ:



10-րդ փուլի արդյունքները.



Լեկո (Հունգարիա)- Հակոբյան(Հայաստան)-0,5:0,5

Արոնյան (Հայաստան)- Յակովենկո(Ռուսաստան)-1:0

Ինարկիեւ (Ռուսաստան)-Բակրո(Ֆրանսիա)-1:0

Իվանչուկ(Ուկրաինա)- Կարյակին(Ուկրաինա)-0,5:0,5

Ալեքսեեւ(Ռուսաստան)-Էլյանով(Ուկրաինա)-1:0

Չեպարինով(Բուլղարիա)-Գելֆանդ(Իսրայել)-1:0

Կամսկի(ԱՄՆ)-Կասիմջանով(Ուզբեկստան) -0,5:0,5



Մրցաշարային իրավիճակը 10 փուլից հետո. Իվանչուկ, Լեկո, Կասիմջանով-6,5; Արոնյան, Ալեքսեեւ-6; Կարյակին, Գելֆանդ-5,5; Էլյանով-5, Բակրո-4,5;Յակովենկո,Հակոբյան, Կամսկի-4; Չեպարինով, Ինարկիեւ-3: