Հրայր Կարապետյան. «Ռուս-թուրքական մերձեցումը հակասում է Հայաստանի շահերին»

PanARMENIAN.Net - «2008 թ. օգոստոսյան պատերազմից հետո նկատելի է Ռուսաստանի համագործակցության խորացում Թուրքիայի հետ, ինչը կարող է ազդել ե'ւ ՀԱՊԿ-ի, ե'ւ ՆԱՏՕ-ի ծրագրերի վրա», - Երեւանում տեղի ունեցած մամլո ասուլիսի ժամանակ ասաց Հայաստանի ԱԺ պաշտպանության, ազգային անվտանգության եւ ներքին գործերի հարցերի մշտական հանձնաժողովի նախագահ, ՀՅԴ ներկայացուցիչ Հրայր Կարապետյանը:



Կարապետյանի խոսքերի համաձայն, Հայաստանի շահերին հակասում է ռուս-թուրքական նման մերձեցումը, քանի որ Հայաստանը Ռուսաստանի դաշնակիցն է, իսկ Թուրքիան ՀՀ-ի համար վտանգ է ներկայացնում: «Հակառակ դեպքում, եթե այդ վտանգը չկա, ինչո՞ւ են Հայաստանին պետք Ռուսաստանի ռազմական բազաները», - նկատեց Հ. Կարապետյանը:



PanANRMENIAN.Net-ի թղթակցի այն հարցին, թե կնպաստի, արդյոք, հայ-թուրքական սահմանի հնարավոր բացումը Հարավային Կովկասի տարածաշրջանի կարգավորմանը, Հրայր Կարապետյանը պատասխանեց, որ Թուրքիան անկանխատեսելի երկիր է եւ առաջնորդվում է պանթուրքիզմի գաղափարախոսությամբ, որն էլ Հայաստանի համար վտանգ է ներկայացնում: «Հակառակ դեպքում թուրքական կողմը հայ-թուրքական սահմանի բացումը չէր պայմանավորի ղարաբաղյան հակամարտության կարգավորմամբ», - նշեց ՀՅԴ խմբակցության անդամը:



Նրա կարծիքով, քանի դեռ Թուրքիան չի զղջացել մարդկության հանդեպ իր հանցագործությունների, մասնավորապես, Հայոց ցեղասպանության իրագործման համար, Հայաստանի ազգային անվտանգության համար միշտ էլ վտանգ կներկայացնի: