ՕՐԲԵԼՅԱՆԻ ՀԻՄՆԱԴՐԱՄԸ ԹՈՇԱԿՆԵՐ ԿՏՐԱՄԱԴՐԻ ԵՐԻՏԱՍԱՐԴ ՏԱՂԱՆԴԱՎՈՐ ՀԱՅ ԵՐԱԺԻՇՏՆԵՐԻՆ

PanARMENIAN.Net - «Օրբելյանի հիմնադրամի» կողմից սահմանված «միջազգային փոխանակման թոշակների» բաշխման համար փետրվարի 16-ից 20-ը Երեւանում կկայանան լսումներ: Հիմնադրամը, որի նախագահն է Սթենֆորդի համալսարանի գեղարվեստական ղեկավար եւ Ռուսաստանի Պետական կամերային նվագախմբի գլխավոր դիրիժոր Կոնստանտին Օրբելյանը (ԱՄՆ), հիմնվել է Լոս Անջելեսում եւ կոչված է օժանդակել երիտասարդ տաղանդավոր երաժիշտներին իրենց ուսման ժամանակահատվածում: Թոշակները շնորհվում են Երեւանում, Սանկտ Պետերբուրգում եւ Մոսկվայում: Այս տարի սահմանված է նաեւ Գյումրիի համար: Լսումները անց են կացվում երկու տարիքային խմբերի համար հետեւյալ մասնագիտություններով` ֆորտեպիանո, ջութակ, թավջութակ, փողային գործիքներ, վոկալ: Թոշակի բաշխման համար թեկնածուներից յուրաքանչյուրին կլսի անձամբ Օրբելյանը, եւ նա էլ կորոշի հաղթողին: Թոշակային պարգեւաբաշխման հիմնադրամը, որը կազմում է 4 հազար դոլար, կբաշխվի հապատասխանաբար առաջին, երկրորդ, երրորդ պարգեւների արժանացած մասնակիցների միջեւ: Առաջին թոշակը 1200 դոլար է, եւ «Սանկտ Պետերբուրգի պալատներ» փառատոնում մենահամերգ` Ռուսաստանի Պետական կամերային նվագախմբի նվագակցությամբ: Երկրորդ թոշակը (երկու տեղ)` 600 դոլար է, երրորդը (չորս տեղ)` 360 դոլար: Մրցույթին մասնակցելու համար դիմումներ են ներկայացրել հարյուրից ավելի թեկնածուներ Երեւանից եւ գյումրիից:



Լրատվության արտատպելու, կամ օգտագործելու դեպքում հղումը "PanARMENIAN.Net -ի վրա պարտադիր է: