Բրյուսելում Հայաստանի դեսպանությունը Բելգիայի հայ արվեստագետների համար միջոցառում է կազմակերպել

PanARMENIAN.Net - Դեկտեմբերի 19-ին Հայաստանի դեսպանությունն ընդունելություն կազմակերպեց Բելգիայի 50 հայ արվեստագետների պատվին: Միջոցառման նպատակն էր հնարավորություն ստեղծել ՀՀ դեսպանություն այցելած ինչպես արդեն ճանաչում ունեցող, այնպես էլ ստեղծագործական առաջին քայլերն անող բելգիաբնակ հայ նկարիչների, երաժիշտների, գրողների եւ գոբելենագործների համար` միմյանց ծանոթանալու, դեսպանության միջոցով Հայաստանի հետ կապն ամրապնդելու եւ համատեղ միջոցառումներ կազմակերպելու համար:



Ինչպես հաղորդում է Հայաստանի Արտաքին գործերի նախարարության մամլո ծառայությունը, ողջունելով հայ արվեստագետներին` ՀՀ դեսպան Ավետ Ադոնցը նշեց, որ հայ արվեստագետների արձագանքը դեսպանության հրավերին ցույց է տալիս այն առկա ներուժը, որը լավագույնս պետք է ծառայի Հայաստանը եւ հայ մշակույթը Եվրոպայի մայրաքաղաքում ներկայացնելու պատասխանատու գործին: Առկա ներուժի ինքնակազմակերպումը կարժանանա դեսպանության ամենայն աջակցությանը եւ կհանդիսանա համազգային նպատակները միասնաբար իրականացնելու կարեւոր քայլ:



Ներկաներին ողջունեց նաեւ Բրյուսելի հայկական հովվապետ Զատիկ վարդապետը: Բարձր գնահատելով ՀՀ դեսպանի նախաձեռնությունը, նա կարեւորեց հայ համայնքի եւ դեսպանության համագործակցությունը արտերկրում հայկական մշակութային արժեքների լավագույնս ներկայացնելու նպատակով:Միջոցառման անակնկալը Բրյուսելի գեղեցկության 2009թ. մրցույթի հաղթող, հայազգի Գոհար Ավետիսյանի մասնակցությունն էր: