ՀՅԴ-ն ՀՀ ՍԴ-ից պահանջում է հայ-թուրքական Արձանագրությունները հակասահմանադրական ճանաչել

11 հունվարի 2010 - 20:48 AMT

PanARMENIAN.Net -
Հունվարի 11-ին հայ-թուրքական Արձանագրությունների դեմ ՀՅ Դաշնակցության (ՀՅԴ) կողմից կազմակերպված բողոքի ցույցի ժամանակ Հայաստանի ՀՅԴ Բարձրագույն մարմնի անդամ Հրայր Կարապետյանը ցույցի բոլոր մասնակիցների անունից նամակ հանձնեց ՀՀ ՍԴ ներկայացուցչին:

Ինչպես իր ելույթում նշեց ՀՅԴ խորհրդարանական խմբակցության պատգամավոր Արմեն Ռուստամյանը, նամակում պարունակվում է իրավաբանորեն հիմնավորված եզրակացությունը, որում մատնանշվում է, որ ստորագրված հայ-թուրքական Արձանագրություններն իրենց մեջ թուրքական կողմի նախապայմաններն են կրում եւ սպառնալիք են ներկայացնում Հայաստանի ազգային անվտանգության համար:

Ռուստամյանը նշեց, որ հայ-թուրքական Արձանագրությունները չեն համապատասխանում ՀՀ Սահմանադրությանը, քանի որ այդ փաստաթղթերի կազմման ու ստորագրման գործընթացում չեն պահպանվել բոլոր համապատասխան գործընթացները, որոնք նախատեսված են «Միջազգային պայմանագրերի մասին» ՀՀ օրենքով:

Պատգամավորի խոսքով, Արձանագրություններում Հայաստանի եւ Թուրքիայի միջեւ կարգավորման հիմնական առարկան մնում է սահմանի երկկողմ ճանաչումը, ինչը Հայաստանի իշխանությունները ժխտում են: «Եթե դա այդպես չէ, ապա ՀՀ ղեկավարությունը պետք է հանդես գա Արձանագրություններրի` երկու երկրների սահմանների ճանաչմանը վերաբերող կետի մասին վերապահումով»,- նշեց Ռուստամյանը: Նա ավելացրեց նաեւ, որ Հայաստանի իշխանությունները ձեռնպահ են մնում այդ քայլից, քանի որ սահմանների ճանաչումն այդ փաստաթղթերի շրջանակներում կարգավորման հիմնական հարցն է»,- ընդգծեց նա:

Ինչպես նկատեց Արմեն Ռուստամյանը, Սահմանադրական դատարանին հասցեագրված նամակում առաջարկվում է Արձանագրությունները ՀՀ Սահմանադրությանն անհամապատասխան կամ մասնակիորեն համապատասխանող ճանաչել, որպեսզի Հայաստանի կառավարությունը համապատասխան վերապահումներ կատարի այդ փաստաթղթերի վերաբերյալ: «Եւ միայն դրանից հետո Հայաստանը կարող է նոր տողից սկսել բանակցությունները Թուրքիայի հետ»,- ընդգծեց նա:

Հայ-թուրքական հարաբերությունների կարգավորման մասին Արձանագրություններ

Հայ-թուրքական հարաբերությունների կարգավորման մասին Արձանագրությունները ստորագրվել են 2009թ. հոկտեմբերի 10-ին Ցյուրիխում: Արձանագրությունները ստորագրել են Հայաստանի եւ Թուրքիայի ԱԳ նախարարներ Էդվարդ Նալբանդյանը եւ Ահմեդ Դավութօղլուն` Ֆրանսիայի, ԱՄՆ-ի, ՌԴ-ի եւ Շվեյցարիայի ԱԳՆ ղեկավարների ներկայությամբ: Շվեյցարիան որպես միջնորդ է հանդես գալիս հայ-թուրքական բանակցություններում 2007թ. ի վեր: Ըստ փաստաթղթերի, երկրների միջեւ պետք է հաստատվեն դիվանագիտական հարաբերություններ եւ պետք է բացվի 1993թ. ի վեր փակ հայ-թուրքական սահմանը: Հունվարի 12-ին Հայաստանի Սահմանադրական դատարանն Արձանագրությունները Հայաստանի Սահմանադրությանը համապատասխան ճանաչեց: ՍԴ որոշման մեջ Արձանագրությունների վերաբերյալ ոչ մի նախապայմաններ չկան, քանի որ դա հակասում է վճռի կայացման սահմանված կանոնին: ՍԴ որոշման համաձայն Հայ-թուրքական արձանագրությունները համապատասխանում են ՀՀ Սահմանադրությանն ու Հայաստանի Անկախության մասին հռչակագրին:

Հայ հեղափոխական դաշնակցություն

Հայ հեղափոխական դաշնակցությունը հնագույն քաղաքական կուսակցություն է: Ստեղծվել է 1890թ. Թիֆլիսում: 1918-20թթ. Դաշնակցությունը եղել է ՀՀ իշխող կուսակցությունը: Խորհրդային զորքեր մտցնելու արդյունքում դաշնակների կառավարությունը դադարեցրեց գոյությունը, նրա զինված կազմավորումները ջախջախվեցին, ղեկավարության մի մասը գնդակահարվեց, մի մասը` արտագաղթեց: 1988թ. կուսակցությունը վերադարձավ Հայաստան եւ Լեռնային Ղարաբաղ: Ներկայումս ՀՅԴ բաժանմունքներ կան Սփյուռքի բոլոր երկրներում, հատկապես ուժեղ են նրա դիրքերը Մերձավոր Արեւելքում եւ Հարավային Ամերիկայում:

1994թ. ՀՀ նախագահ Լեւոն Տեր-Պետրոսյանի հրամանագրով կուսակցության գործունեությունը երկրի տարածքում արգելվեց, մի շարք անդամներ ձերբակալվեցին: 1998թ. հրամանագիրը չեղյալ հայտարարվեց նորընտիր նախագահ Ռոբերտ Քոչարյանի կողմից: Այսօրվա դրությամբ կուսակցությունը ընդդիմության շարքերում է: Երեւանում է գտնվում կուսակցության ղեկավար մարմինը` Բյուրոն: Կուսակցությունը Սոցինտերրնի անդամ է:

Կուսակցության ծրագիրն անփոփոխ է մնում` ազատ, անկախ եւ միացյալ Հայաստանի ստեղծում 1920թ. Սեւրի պայմանագրի հաստատած սահմաններում, այսինքն Մեծ Հայաստանի մի մասի վրա: