ԵԱՀԿ նախագահը հանդիպեց Հայաստանի խորհրդարանի կուսակցությունների ներկայացուցիչների հետ

16 փետրվարի 2010 - 19:56 AMT

PanARMENIAN.Net -
Փետրվարի 16-ին Ազգային ժողովի փոխնախագահ Արեւիկ Պետրոսյանը եւ ԱԺ խմբակցությունների ներկայացուցիչները հանդիպեցին ԵԱՀԿ գործող նախագահ, Ղազախստանի Հանրապետության պետքարտուղար, արտաքին գործերի նախարար Կանատ Սաուդաբաեւի գլխավորած պատվիրակությանը:

Ողջունելով հյուրերին` Ազգային ժողովի փոխնախագահ Արեւիկ Պետրոսյանը կարեւորեց Հայաստանի եւ Ղազախստանի համագործակցությունը, որի վկայությունն է նաեւ այն, որ Հայաստանը պաշտպանեց Ղազախստանի թեկնածությունը` 2010 թվականին նախագահելու ԵԱՀԿ-ում: Նա հույս հայտնեց, որ պարոն Սաուդաբաեւի այցը հնարավորություն կտա անմիջականորեն ծանոթանալու տարածաշրջանի խնդիրներին, քննարկելու Հայաստան-ԵԱՀԿ հարաբերություններին առնչվող եւ փոխադարձ հետաքրքրություն ներկայացնող բազմաթիվ այլ հարցեր: Հայաստանը կարեւորում է համագործակցությունը ԵԱՀԿ-ի հետ, որը կարեւոր դեր է ստանձնել Ղարաբաղյան հակամարտության կարգավորման գործում:

Արեւիկ Պետրոսյանը նաեւ հույս հայտնեց, որ ԵԱՀԿ-ում Ղազախստանի նախագահության ժամանակահատվածում կձեռնարկվեն տարածաշրջանում խաղաղ գոյակցության եւ հակամարտությունների խաղաղ կարգավորման անհրաժեշտ քայլեր: ԱԺ փոխնախագահը բարձր գնահատեց ԵԱՀԿ-ի Մինսկի խմբի համանախագահների` ղարաբաղյան հակամարտության խաղաղ կարգավորմանն ուղղված ջանքերը, առանձնապես կարեւորեց միջազգայնորեն ճանաչված ինքնորոշման իրավունքը ղարաբաղյան հակամարտության կարգավորման հիմքում դնելու Ղարաբաղի ժողովրդի օրինական պահանջը: Տիկին Պետրոսյանը բարձր գնահատեց նաեւ ԵԱՀԿ ԽՎ-ի դերը ժողովրդավարական գործընթացների, միջխորհրդարանական երկխոսության ամրապնդման գործում:

ԵԱՀԿ գործող նախագահ Կանատ Սաուդաբաեւն իր հերթին շնորհակալություն հայտնեց ջերմ խոսքերի համար, տեղեկացրեց, որ իր հանդիպման նպատակն է տեղում ծանոթանալ ԼՂ հակամարտության կարգավորման վերաբերյալ ՀՀ քաղաքական ուժերի տեսակետներին, քանզի հակամարտող կողմերի դրսեւորած բարի կամքի եւ փոխզիջման դեպքում է հնարավոր հարցի վերջնական լուծումը, իսկ միջազգային կազմակերպություններն ու այս խնդրի կարգավորմամբ մտահոգ երկրները օգնող են միայն:

Ղարաբաղյան հակամարտության կարգավորման վերաբերյալ իրենց տեսակետները հայտնեցին ԱԺ խմբակցությունների ներկայացուցիչները:

ԲՀԿ խմբակցության քարտուղար Արամ Սաֆարյանի գնահատմամբ` ղարաբաղյան հիմնախնդիրը պետք է կարգավորվի միջազգայնորեն ճանաչված երեք կարեւոր սկզբունքների հաշվառումով` կարեւորելով հատկապես ինքնորոշման իրավունքը:

ՀՅԴ խմբակցության ղեկավար Վահան Հովհաննիսյանը համոզմունք հայտնեց, որ տարածքային ամբողջականության սկզբունքը պետք է գործի այն դեպքում, եթե մի երկիր խառնվում է մեկ ուրիշ երկրի գործերին, իսկ եթե մի երկրի ներսում ազգային-տարածքային կազմավորումներն են ինքնուրույն ապրելու ճանապարհ ընտրում, ինչը տեղի է ունեցել Լեռնային Ղարաբաղի դեպքում, պետք է գործի ինքնորոշման իրավունքը: Նա առաջարկեց նաեւ ԵԱՀԿ նախագահին ԼՂ-ում դեմոկրատական ինստիտուտները վերահսկելու մոնիտորինգ իրականացնել, ինչը կլինի հարցի կարգավորմանն ուղղված լավագույն քայլը:

«Ժառանգություն» խմբակցության ղեկավար Ստեփան Սաֆարյանը տեղեկացրեց, որ իր խմբակցության տեսակետը հակամարտությունների կարգավորման վերաբերյալ միանշանակ է. անխուսափելի է Լեռնային Ղարաբաղի անկախության հռչակումը, ինչը պետք է ընդունվի միջազգային սուբյեկտների կողմից, իսկ ներկա փուլում անհրաժեշտ է Լեռնային Ղարաբաղին ներգրավել հակամարտության կարգավորման բանակցություններին, առանց որի անհնար կլինի հարցի վերջնական կարգավորումը:

ԵԱՀԿ գործող նախագահը համոզմունք հայտնեց, որ խաղաղ բանակցությունների միջոցով հարցի կարգավորումը միակ ընդունելի տարբերակն է, իսկ լիակատար արդյունքի հասնելու համար առաջնային կլինի հակամարտող կողմերի բարի կամքի դրսեւորումն ու փոխզիջումների գնալու պատրաստակամությունը, հաղորդում է ՀՀ ԱԺ հասարակայնության եւ տեղեկատվության միջոցների հետ կապերի վարչությունը:

Ղարաբաղա-ադրբեջանական հակամարտությունը

Ղարաբաղա-ադրբեջանական հակամարտությունը սկսվեց 1988 թվականին: Ի պատասխան Լեռնային Ղարաբաղի ինքնավար մարզի (ԼՂԻՄ) բնակչության 80% կազմող հայերի խաղաղ պահանջներին, Ադրբեջանը ագրեսիա ծավալեց խաղաղ բնակչության դեմ: 1991-1994թթ. ազգային-ազատագրական պատերազմի արդյունքում հռչակվեց Լեռնային Ղարաբաղի Հանրապետությունը: ԼՂՀ պաշտպանության բանակը նաեւ ԼՂՀ շուրջ անվտանգության գոտի ստեղծեց, որը 7 շրջաններ է ներառում: 1994թ. մայիսի 11-ին հրադադարի մասին համաձայնություն ձեռք բերվեց (Բիշկեկյան արձանագրություն): Ներկայումս հակամարտության կարգավորմամբ զբաղվում են ԵԱՀԿ Մինսկի խմբի համանախագահները` Ֆրանսիան, ԱՄՆ-ն եւ Ռուսաստանը:

ԵԱՀԿ

ԵԱՀԿ-ն (OSCE, Organization for Security and Co-operation in Europe)` Եվրոպայում համագործակցության եւ անվտանգության կազմակերպությունը աշխարհի խոշորագույն տարածաշրջանային կազմակերպությունն է, որը զբաղվում է անվտանգության հարցերով: Այն ընդգրկում է 56 երկիր:\r\n\r\nՆախկին անվանումը` Եվրոպայում համագործակցության եւ անվտանգության խորհրդակցություն (Conference for Security and Cooperation in Europe - CSCE):\r\n\r\nԵԱՀԿ-ի մասնակից պետությունները. Ավստրիա, Ալբանիա, Անդորրա, Բելգիա, Բուլղարիա, Բոսնիա եւ Հերցոգովինա, Վատիկան, Մեծ Բրիտանիա, Վենգրիա, Գերմանիա, Հունաստան, Դանիա, Իռլանդիա, Իսլանդիա, Իտալիա, Կիպրոս, Լիխտենշտեյն, Լյուքսեմբուրգ, Մակեդոնիա, Մալթա, Մոնակո, Նիդեռլանդներ, Նորվեգիա, Ֆինլանդիա, Ֆրանսիա, Խորվաթիա, Չեռնոգորիա, Չեխիա, Շվեյցարիա, Շվեդիա, Լեհաստան, Պորտուգալիա, Ռումինիա, Սերբիա, Սան-Մարինո, Սլովենիա, ԱՄՆ, Ռուսաստան, Հայաստան, Ուկրաինա, Հայաստան, Ուզբեկստան, Տաջիկստան, Էստոնիա, Ադրբեջան, Թուրքիա, Թուրքմենստան, Ղրղզստան:\r\n\r\nՀամագործակցության գործընկերներ` Ալժիր, Եգիպտոս, Հորդանան, Մարոկկո, Թունիս, Աֆղանստան, Մոնղոլիա, Հարավային Կորեա, Թաիլանդ, Ճապոնիա:\r\n\r\n1992 թ-ի հունվարի 30-ց Հայաստանը անդամակցում է ԵԱՀԿ-ին: