Ալեքսան Միքայելյանը հունահռոմեական ըմբշամարտի աշխարհի առաջնության բրոնզե դափնեկիր է դարձել

PanARMENIAN.Net - Հուլիսի 20-ին Բուդապեշտում (Հունգարիա) մեկնարկեց ըմբշամարտի աշխարհի երիտասարդական առաջնությունը: Առաջին մրցութային օրը հունահռոմեական ըմբշամարտում հարթակ դուրս եկան Հայաստանի 4 ներկայացուցիչներ: 60 կգ քաշային կարգում Ալեքսան Միքայելյանը հաղթեց Ֆինլանդիայի, Իտալիայի և Վրաստանի ըմբշամարտիկներին ու կարողացավ բրոնզե մեդալ նվաճել, հաղորդում է ՀԱՕԿ պաշտոնական կայքը:

Հայաստանի հավաքականի մնացած ըմբշամարտիկներն առանց մեդալների մնացին: Հուլիսի 21-ին ելույթ կունենան հունահռոմեական ըմբշամարտի վերջին 4 մարզիկները:

Հուլիսի 22-ից կմեկնարկեն ազատ ըմբշամարտի մենամարտերը: Հայաստանից Աշոտ Խաչատրյանը կամ Մաթևոս Սարոյանը հանդես կգան 50 կգ քաշային կարգում, Վոլոդյա Ֆրանգուլյանը` 55 կգ ք/կ, Հրաչյա Շահնազարյանը` 60 կգ ք/կ, Դավիթ Խաչատրյանը` 66 կգ ք/կ, Հայկ Կարապետյանը` 74 կգ ք/կ, Վահե Թամրազյանը` 84 կգ ք/կ, Անդրանիկ Գալստյանը` 96 կգ ք/կ և Տիգրան Քեսայանը` 120 կգ քաշային կարգում: