Երևանի տիկնիկային թատրոնը կբեմադրի Մարկեսին

PanARMENIAN.Net - Երևանի Հովհաննես Թումանյանի անվան պետական տիկնիկային թատրոնում հունվարի 26-ին տեղի կունենա Գաբրիել Գարսիա Մարկեսի «Շատ ծեր մարդը մեծ թևերով» ստեղծագործության մոտիվներով «Թևավորը» ներկայացման պրեմիերան: Այդ մասին Երևանում կայացած մամլո ասուլիսում հայտարարել է Երևանի Հովհաննես Թումանյանի անվան պետական տիկնիկային թատրոնի տնօրեն Ռուբեն Բաբայանը:

Անդրադառնալով թատրոնի ծրագրերին՝ Բաբայանը նշել է, որ Նարինե Գրիգորյանի «Թռիչք քաղաքի վրայով» ներկայացումը կմասնակցի 2011թ. միջազգային թատերական փառատոններին: «Հավանաբար «Թռիչք քաղաքի վրայով» ներկայացումը Մոսկվայում կմասնակցի «Ոսկե դիմակ» փառատոնի արտամրցութային ծրագրին: Մենք արդեն մի քանի հրավեր ունենք Ռուասստանից, Սերբիայից, Թուրքիայից, որոշ հրավերներից մենք ենք հրաժարվում»,-ասել է նա: Բացի այդ, նա հավելել է, որ թատրոնը մտադիր է վերականգնել Հ.Թումանյանի «Շունն ու կատուի» և Տիգրան Զահալյանի «Թզուկի երգի» բեմականացումները: «Այժմ թատրոնն աշխատում է «Ալիսան հրաշքների աշխարհում» ներկայացման վրա»,-ասել է Բաբայանը:

Ամփոփելով 2010թ. արդյունքները՝ Ռուբեն Բաբայանն ասել է, որ Զարուհի Անտոնյանի «Ամպից ընկած հեքիաթը» արժանացել է Պլովդիվի Կամերային ներկայացումների միջազգային փառատոնի նախագահական մրցանակին և ներկայացվել է «Ոսկե դիմակ» փառատոնի «Մասկա պլյուս» ծրագրին:--ԿԱ_-