ԱՄՆ հայոց եկեղեցիների առաջնորդներն ուղերձ են հղել Սբ Հարության և Հայոց ցեղասպանության օրերի կապակցությամբ

PanARMENIAN.Net - Այս տարվա ապրիլին հայ ժողովուրդը նշելու է շատ կարևոր պատմական երկու օր՝ Սբ Հարության տոնն ու Հայոց ցեղասպանության 96-րդ տարելիցը: Հայոց ցեղասպանությունը նորագույն պատմության ամենամութ օրերից մեկն է, իսկ Սբ Հարության տոնը մարդկության համար ամենապայծառ ու լուսավոր տոնն է: Ցեղասպանությունից հետո առաջին անգամ այս երկու օրերը համընկան և նշվելու են ապրիլի 24-ին: Այս մասին ասվում է Հայ Առաքելական, Հայ Կաթողիկե և Հայ Ավետարանչական եկեղեցիների միության առաջնորդների ուղերձում:

«Որպես քրիստոնյաներ մենք ապրիլի 24-ին կնշենք Հիսուս Քրիստոսի հրաշափառ Հարությունը և որպես հայեր կոգեկոչենք մեր ժողովրդի վերածնունդն ու վերականգնումը մոխիրներից ու անգութ Ցեղասպանությունից: Պիտի նշենք մեր հարությունը որպես ժողովրդի, որ ենթակա դարձավ հալածանքների ու բռնադատության, որնք մեկ դար առաջ կսպառնային ի սպառ բնաջնջել մեզ: Մեր ազգային հարությամբ, մենք՝ զավակները հինավուրց ազգի, վառ կպահենք և կհարգենք նահատակների տեսլականն ու ոգին, անկորնչելի ավանդը:

Որպես քրիստոնեությունը պետական կրոն առաջինն ընդունած երկրի զավակներ, կոչ ենք անում մեր քրիստոնյա բոլոր եղբայրներին ու քույրերին և բոլոր կրոնների հավատացյալներին, որպեսզի Սբ Հարության տոնի օրը մեզ հետ աղոթեն ի հիշատակ Օսմանյան կայսրությունում ցեղասպանության զոհ դարձած ավելի քան 2,5 մլն հայերի, ասորիների, պոնտացի հույների, հոների: Աղոթենք նաև, որ արդարությունն ու խաղաղությունը տիրական դառնան մեր աշխարհում»,-ասվում է ուղերձում, հաղորդում է Ամերիկայի Արևմտյան ափի Հայ Դատի հանձնախումբը: