Սերգեյ Խաչատրյանն Իտալիայում կներկայացնի Շոստակովիչի ջութակի կոնցերտը

PanARMENIAN.Net - Աշխարհահռչակ վիրտուոզ ջութակահար Սերգեյ Խաչատրյանը ելույթ կունենա Իտալիայում: Ինչպես հայտնում է ջութակահարի պաշտոնական կայքը, նա ելույթ է ունենալու 3 օր` փետրվարի 23-ին և 24-ին Թուրինում, իսկ փետրվարի 25-ին` Կրեմոնայում: Երեք համերգներում էլ Խաչատրյանը RAI ազգային սիմֆոնիկ նվագախմբի հետ ներկայացնելու է Շոստակովիչի ջութակի կոնցերտը:

Սերգեյ Խաչատրյանը ծնվել է 1985 թվականին Երևանում՝ երաժիշտ-դաշնակահարների ընտանիքում։ 1993 թվականից ընտանիքը տեղափոխվել է Գերմանիա՝ մշտական բնակության։ Ջութակ նվագել սկսել է վեց տարեկանից՝ պրոֆեսոր Պետրոս Հայկազյանի դասարանում, ուսումը շարունակել է պրոֆեսոր Գ. Ժիսլինի դասարանում՝ Վուրցբուրգ քաղաքում, իսկ 1996 թվականից աշակերտում է Յոզեֆ Ռիսսինին՝ Կարլսռուհեյի երաժշտկան բարձրագույն դպրոցում։ 9 տարեկանում Խաչատրյանը առաջին անգամ հանդես է եկել սիմֆոնիկ նվագախմբի հետ որպես մենակատար։ Տարբեր սիմֆոնիկ նվագախմբերի հետ հանդես է եկել աշխարհի շուրջ 50 երկրներում, այդ թվում և Հայաստանում՝ տարին մի քանի անգամ։ Պարբերաբար մասնակցում է դասական երաժշտության երևանյան Վերադարձի փառատոնին։