Առաջիկայում Թուրքիան կհրապարակի իր միջուկային ծրագիրը

PanARMENIAN.Net - Թուրքիան մոտ ապագայում կհրապարակի ատոմի խաղաղ օգտագործման իր ծրագիրը: Այդ մասին Վիեննայում հայտարարել է Թուրքիայի ԱԳՆ ղեկավար Աբդուլլահ Գյուլը ՄԱԳԱՏԷ-ի գլխավոր տնօրեն Մուհամմեդ ալ Բարադեի հետ հանդիպումից հետո: «Մեր ատոմային ծրագիրը բացառապես խաղաղ է լինելու: Նրա հիմքում կլինի թափանցիկությունը, համագործակցության համար բաց լինելը եւ համագործակցությունը ՄԱԳԱՏԷ-ի հետ: Ատոմային ծրագրի շրջանակներում Թուրքիան նախատեսում է մինչեւ 2016 թվականը կառուցել երեք ԱԷԿ: Դրանց կառուցումն, ըստ փորձագետների, կպահանջի 7-8 մլրդ դոլար: Թուրքական ԱԷԿ-ների ընդհանուր հզորությունը կկազմի շուրջ 5 հազար մեգավատտ»,-նշել է Գյուլը: Առաջին կայանի կառուցման մեկնարկը նախատեսվում է 2007թ.: Առաջին թուրքական ԱԷԿ-ը կկառուցվի Սինոպ սեւծովյա գավառում: Այն շահագործման կհանձնվի 2012 թվականին: Այդ նախագծի հանդեպ հետաքրքրություն են ցուցաբերում Ռուսաստանը, ԱՄՆ-ն Չինաստանը, Մեծ Բրիտանիան, Ֆրանսիան, Կանադան, Հարավային Կորենա եւ Ճապոնիան: Ավելի վաղ Թուրքիան բազմիցս ԱԷԿ-ի կառուցման մրցույթներ է հայտարարել: 2000 թվականին առաջին ԱԷԿ-ի կառուցման նախագիծը փակվեց անբավարար ֆինանսավորման պատճառով:



Թուրքիայի իշխանությունները արագացրեցին ԱԷԿ-ի շինարարության հետ կապված աշխատանքներն այն բանից հետո, երբ 2006 թ. կտրուկ նվազեց բնական գազի առաքումը Իրանից: Այն ժամանակ էլ երկրի էներգետիկայի նախարար Հիլմի Գյուլերը հայտարարեց դրսից էներգակիրների ներկրումից երկրի կախվածությունը նվազեցնելու եւ դրանց շուտափույթ դիվերսիֆիկացման անհրաժեշտության մասին, հաղորդում է CNN-Turk հեռուստաընկերությունը: