Հայկական ընդդիմությունը պահանջում է անվավեր ճանաչել նախագահական ընտրությունները

PanARMENIAN.Net - Հայկական ընդդիմությունը վերջնագիր է ներկայացրել երկրի իշխանություններին: Մասնավորապես, ընդդիմությունը պահանջում է կայացած նախագահական ընտրությունները անվավեր ճանաչել եւ նոր ընտրություններ նշանակել, ինչպես նաեւ ուղիղ եթեր տրամադրել Հայաստանի Հանրային հեռուստաալիքով եւ քրեական գործ հարուցել այն անձանց նկատմամբ, ովքեր պատասխանատու են ընդդիմության կողմնակիցների ծեծի, ընտրական գործընթացի կեղծման եւ ընտրական օրենսդրության խախտման համար:



Ընդդիմադիր թեկնածու Լեւոն Տեր-Պետրոսյանի կողմնակիցները վերը նշված բոլոր խախտումների համար մեղադրում են «փոխվարչապետ Հովիկ Աբրահամյանի մերձավորներին, խորհրդարանում ՀՀԿ անդամ Ռուբեն Հայրապետյանին եւ Կոտայքի մարզպետ Կովալենկո Շահգելդյանին»: Կոչ անելով բոլոր ուսանողներին բոյկոտել դասերը` ընդդիմադիրները նաեւ խոստացել են, որ այն բանից հետո, երբ Լեւոն Տեր-Պետրոսյանը գրավի նախագահի պաշտոնը, հատուկ աշխատանքային խումբ կստեղծվի, որը կհետաքննի վերջին ամիսներին տեղ գտած բոլոր հեռացումների հանգամանքները, հաղորդում է Regnum-ը:



Հիշեցնենք, որ այսօր ընդդիմադիրները հայտարարել են, որ մտադիր են բողոքի ցույցերի անցկացման շուրջօրյա ռեժիմի անցնել: Առաջին նախագահ Լեւոն Տեր-Պետրոսյանի նախընտրական շտաբի ղեկավար Նիկոլ Փաշինյանը հայտարարել է, որ «Ազատության» հրապարակը կդառնա բողոքի ցույցերի կենտրոն: Հանրահավաքին հանդես է եկել նաեւ խորհրդարանի նախկին խոսնակ Արթուր Բաղդասարյանի նախընտրական շտաբի ղեկավար Հեղինե Բիշարյանը: Իրավապահ մարմինների ներկայացուցիչները հայտարարել են, որ հանրահավաքը արտոնված չէ: Սակայն ժողովուրդը չի լսել իրավապահ մարմիններին եւ շարունակում է ցույցը: