ԵՄ. Ընտրությունները «նշանակալի առաջընթաց» չնշանավորեցին Ադրբեջանի ժողովրդավարական զարգացման գործում

PanARMENIAN.Net - Ընտրությունները «նշանակալի առաջընթաց» չնշանավորեցին Ադրբեջանի ժողովրդավարական զարգացման գործում, թեև խաղաղ էին և դրանց մասնակցում էին բոլոր ընդդիմական կուսակցությունները: Այդ մասին ասվում է արտաքին գործերով Եվրամիության գերագույն ներկայացուցիչ Քեթրին Էշթոնի հայտարարության մեջ: Վերջինս Ադրբեջանի իշխանություններին կոչ է արել վերացնել բոլոր խախտումներն ու թերությունները, որոնք հայտնաբերվել էին ԵԱՀԿ/ԺԻՄԻԲ առաքելության կողմից ընտրական գործընթացի ժամանակ:

«Ես Ադրբեջանի իշխանություններին կոչ եմ անում նաև ակտիվացնել ժողովրդավարական սկզբունքների և մարդու իրավունքների ոլորտում, մասնավորապես, ժողովրդավարական պլյուրալիզմին, ԶԼՄ ազատությանն ու հավաքների ազատությանն առնչվող իրենց միջազգային պարտավորությունների կատարման ուղղությամբ ջանքերը»,- ասվում է ԵՄ գերագույն ներկայացուցչի հայտարարության մեջ:

ԵՄ գերագույն ներկայացուցչի խոսքով, Ադրբեջանը ԵՄ համար առանցքային գործընկեր է, և Եվրամիությունը պատրաստ է շարունակել աջակցությունը հետագա քաղաքական բարեփոխումների իրականացմանը, այդ թվում` «Արևելյան գործընկերության» շրջանակներում, հաղորդում է ՌԻԱ Նովոստին:

Ավելի վաղ ԱՄՆ պետքարտուղարությունը հայտարարել էր, որ Ադրբեջանում խորհրդարանական ընտրությունները խաղաղ էին, բայց չեն համապատասխանել միջազգային չափանիշներին:

Ադրբեջանի Միլլի Մեջլիսի (խորհրդարան) ընտրությունները կայացան նոյեմբերի 7-ին: Կենտրոնական ընտրական հանձնաժողովի նախնական տվյալներով, ընտրություններում հաղթել է և Ազգային ժողովի 125 տեղերից ավելի քան 70-ը կստանա նախագահ Իլհամ Ալիևի «Ենի Ազերբայջան» («Նոր Ադրբեջան») կուսակցությունը: