Աշխարհի ցանկացած մարզիկի համար կարևոր միջոցառում համարվում է Օլիմպիադան: Նրանք տարիներ շարունակ մարզվում ու պայքարում են, որպեսզի հնարավորություն ունենան մասնակցելու Օլիմպիական խաղերին և մեդալ նվաճել:

Այս անգամ ևս հազարավոր մարզիկներ Լոնդոնում կհավաքվեն «Կարևորը մասնակցությունն է» Օլիմպիական կարգախոսի ներքո, բայց և միևնույն ժամանակ, բացի մասնակցությունից կանեն ամեն ինչ, որպեսզի իրենց անունը հավերժացնեն Օլիմպիոսում:

Աշխարհի 203 երկրների ներկայացուցիչների մեջ են լինելու նաև Հայաստանի 25 ներկայացուցիչները, որոնք ելույթ կունենան 10 մարզաձևերում:

Այսպիսի կարևոր ու նշանակալից միջոցառմանը չէր կարող չանդրադառնալ PanARMENIAN.Net-ը: Մեր մարզական լրագրողներ Գոհար Նալբանդյանն ու Հասմիկ Բաբայանը «Հայաստանի Օլիմպիական հավաքական» խորագրի ներքո մինչ խաղերի մեկնարկը ձեր ուշադրությանը կներկայացնեն տարբեր հարցազրույցներ մեր բոլոր մարզիկների, մարզիչների ու մարզական ներկայացուցիչների հետ, կծանոթացնեն հայ օլիմպիականների կենսագրություններին ու նվաճած մեդալներին: Դուք կարող եք ընթերցել նաև տարբեր վերլուծական նյութեր ու դիտել մեր մարզիկներին ներկայացնող ֆոտոշարքեր: Իսկ արդեն Օլիմպիադայի օրերին PanARMENIAN.Net-ը կտեղեկացնի մեր մարզիկների ելույթների մասին ու կներկայացնի տարբեր կարծիքներ:

Հաջողություն մաղթենք մեր բոլոր մարզիկներին` հուսալով, որ այս տարի նրանց կհաջողվի շատացնել Հայաստանի Օլիմպիական մեդալների թիվը: