Eye Care Plus բջջային հավելվածի հեղինակները հայտարարում են, որ հավելվածը չի կարող փոխարինել կանոնավոր հետազոտումն ակնաբույժի մոտ և խորհուրդ է տալիս ծրագրի առաջարկած թեստերից հետո հետազոտվել մասնագետի մոտ:

Սկսնակ ընկերության համահիմնադիր և տնօրեն Պավել Սնխչյանը պատմել է PanARMENIAN.Net-ին այն մասին, թե ինչ է իրենից ներկայացնում այս մշակումը: Եթե կարճ, Eye Care Plus-ը աչքերի համար անհատական վարժությունների հավաքածու է տեսողության բարելավման, ինչպես նաև տեսողության հետ կապված խնդիրների կանխման համար նախատեսված տեսողական թերապիայի վարժությունների ամենօրյա պլանի տեսքով: Ըստ էության, սա ծրագրային փաթեթ է, բաղկացած հիմնական հավելվածից և արբանյակ հավելվածներից, որոնք ոչ մեծ լրացուցիչ թեստեր են և թրենինգներ: Ամբողջական տեսքով այն թույլ է տալիս ի հայտ բերել խնդիրն ու կանխել հետագա բարդացումը հատուկ վարժությունների միջոցով:

«Գլխավորը բարդացումը կանխելն է: Հավելվածը ներառում է ծավալուն բովանդակություն օգտակար խորհուրդների տեսքով, այդ թվում տեսողության հետ կապված ճգնաժամային իրավիճակներում մարդու գործողությունների վերաբերյալ: Օգտատերերեը նաև հնարավորություն ունեն անվճար խորհրդակցելու մասնագետների հետ, որոնց օգնությամբ մենք մշակում ենք մեր թեստերն ու թրենինգները: Հավելվածում արտացոլված է ակնաբուժության լավագույն մեթոդաբանությունն ու վերջին տարիների փորձը: Մենք փորձել ենք ի մի բերել այդ ամենը և ճիշտ ներկայացնել բջջային հավելվածի տեսքով»,-ասել է Սնխչյանը:

Հավելվածն առաջարկում է աչքերի համար ամենատարբեր վարժությունների լայն ընտրանի` դա և հատուկ տիբեթական մեթոդն է, և հայտնի բժիշկների մշակած մեթոդը: Ընդ որում, օպտիմալ մեթոդաբանությունն առաջարկվում է օգտատերին միայն հատուկ թեստեր անցնելուց հետո, որոնք ի հայտ են բերում խնդիրը: Օգտատերը կարող է ինքնուրույն հարմարեցնել վարժությունները սեփական կարիքների և ժամանակացույցի հետ:

«Այս պահին հավելվածը հասանելի է միայն Android հարթակում, սակայն iOS-տարբերակի մշակումն արագ առաջ է ընթանում: Անշուշտ, Eye Care Plus-ը իր տեսակի մեջ եզակի չէ, ունի նաև մրցակիցնր: Սակայն մենք շատ նորույթներ ենք առաջարկում, ինչն ուրիշները չունեն: Մեկ հավելվածի շրջանակում մենք ավելի շատ ծառայություններ ենք առաջարկում: Հետագայում ստարտափը մտադիր է համագործակցություն հաստատել բուժհաստատությունների հետ»,-հավելել է Սնխչյանը:

Ստարտափը հիմնվել է 2 ամիս առաջ, աշխատակիցները 8-ն են: Eye Care Plus-ը ներկայացվել է նաև DigiTec Expo 2015 ցուցահանդեսում: