Ծանոթանալով ցանկին` PanARMENIAN.Net-ը ներկայացնում է 5 նորույթ, որոնք դեկտեմբերին կցուցադրվեն Երևանի կինոթատրոններում:
«Ծովի սրտում» (օիգ. անվանումը` In the Heart of the Sea)
Դրամա, թրիլեր, արկածային, ԱՄՆ, 2015 թ.
Ռեժիսոր` Ռոն Հովարդ
Դերերում` Քրիս Հեմսվորթ, Բենջամին Ուոքեր, Քիլիան Մըրֆի, Թոմ Հոլանդ, Բեն Ուիշոու, Բրենդան Գլիսոն:
Պրեմիերան Երևանում դեկտեմբերի 3-ին:
Կոմիքսային բլոկբաստերների այս դարաշրջանում իրական արկածներով իսկական կինոն դեֆիցիտ ապրանք է դարձել: Անարդարացիորեն մոռացված, սակայն դրանից ոչ պակաս հիասքանչ: Փիթեր Ուիրի «Ծովերի տիրակալը» արկածային կինոյի դարաշրջանի վերջն ազդարարեց: Այս զարգացումը դուր չեկավ մեծն ռեժիսոր Ռոն Հովարդին, որի շնորհիվ ժանրի սիրահարները հնարավորություն ստացան մեկ անգամ ևս ընկղմվելու արկածային ռոմանտիզմի խորհրդավոր, վտանգավոր և անհավատալի գեղեցիկ աշխարհը: Չնայած ակնհյատ զուգահեռներին Գերման Մելվիլի լեգենդար «Մոբի Դիկի» հետ, «Ծովի սրտում» ֆիլմն իրականում հիմնված է իրական իրադարձությունների վրա, որոնք տեղի են ունեցել «Էսեքս» կետորս նավի անձնակազմի հետ` կաշալոտի կողմից հարձակման ենթարկվելուց հետո:
«Լրտեսական կամուրջ» (օրիգ. անվանումը` Bridge of Spies)
Դրամա, թրիլեր, ԱՄՆ, 2015 թ.
Ռեժիսոր` Սթիվեն Սփիլբերգ
Դերերում`Թոմ Հենքս, Մարկ Ռայլենս, Էմի Ռայան, Ալան Ալդա, Օսթին Սթոուել
Պրեմիերան Երևանում դեկտեմբերի 3-ին:
«60-ականներից մեր օրերը վերադառնալու համար հարկ կլինի սպասել մինչև, որ կինոդահլիճը լուսավորվի և էկրանին վերջին լուսագրերը հայտնվեն»: Իր տպավորություններն այդպես է նկարագրել հեղինակավոր կինոքննադատներից մեկը` դիտելով Սփիլբերգի նոր արարումը: Մեծ էկրաններին հայտնվելուց («Լինքոլն») 3 տարի անց ռեժիսորը որոշել է կրկին անդրադառնալ քաղաքական դրամայի ժանրին: Դատելով կինոքննադատների և համաշխարհային մամուլի հիացական արձագանքներից` դա նրան հաջողվել է: Ֆիլմի գործողությունը ծավալվում է իրական պատմական իրադարձությունների ֆոնին և պատմում է բրուքլինցի փաստաբան Ջեյմս Դոնովանի մասին, որը Սառը պատերազմի տարիներին հայտնվում է սովետա-ամերիկյան դիմակայության կիզակետում: Կինոնկարի դրամատուրգիական հիմքի ստեղծմանը մասնակցել են հանճարեղ Քոեն եղբայրները, և այդ համագործակցությունը, ինչպես նաև առաջատար դերասանների մասնակցությունը, «Լրտեսական կամուրջի» դիտումը դարձնում են պարտադիր իսկական կինոյի սիրահարների համար:
«Սիրո մասին»
Կատակերգություն, Ռուսաստան, 2015 թ.
Ռեժիսոր` Աննա Մելիքյան
Դերերում` Ռենատա Լիտվինովա, Միխայիլ Եֆրեմով, Մարիա Շալաևա, Վասիլի Ռակշա, Յուլիա Սնիգիր, Վլադիմիր Մաշկով
Պրեմիերան Երևանում դեկտեմբերի 10-ին:
«Սիրո մասին» կինոալմանախը փորձ է պատասխանելու մի կարևոր հարցի. ի՞նչ է այնուամենայնիվ սերը: Ամենատարբեր պերսոնաժների ու պատմությունների շարանը միահյուսվում է ֆիլմում ամենատարբեր բաների մասին փոքր պատմությունների միջոցով, որոնք բոլորը սիրո մասին են: Աննա Մելիքյանի ֆիլմը, որն արժանացել է «Կինոտավր-2015» բաց ռուսական կինոփառատոնի գլխավոր մրցանակին, շատ ջերմ ընդունվեց կինոքննադատների կողմից: Սովորական մարդկանց և նրանց փոխհարաբերությունների ազնիվ պատմությունները, լավ հումորն ու դերասանների հաջող խաղը կարող են հետաքրքրել ամենատարբեր նախասիրությունների կինոդիտողին: Շատ լավ ժամանց է ամանորյա տոներին ընդառաջ:
«Աստղային պատերազմներ. Ուժն արթնանում է» (օրիգ. անվանումը` Star Wars: The Force Awakens)
Ֆանտաստիկա, ԱՄՆ, 2015 թ.
Ռեժիսոր` Ջ.Ջ.Աբրամս
Դերերում` Ջոն Բոյեգա, Դեյզի Ռիդլի, Ադամ Դրայվեր, Օսկար Այզեկ, Էնդի Սերկիս, Դոնալ Գլիսոն, Մաքս ֆոն Սյուդով, Հարիսոն Ֆորդ, Քերի Ֆիշեր
Պրեմիերան Երևանում դեկտեմբերի 17-ին:
Առանց մեկնաբանությունների…
«Ալիքի կատարին» (օրիգ. անվանումը` Point Break)
Մարտաֆիլմ, ԱՄՆ, 2015 թ.
Ռեժիսոր` Էրիքսոն Քոր
Դերերում` Էդգար Ռամիրես, Լյուկ Բրեյսի, Ռեյ Ուինսթոն, Թերեզա Փալմեր, Դելրոյ Լինդո
Պրեմիերան Երևանում դեկտեմբերի 24-ին:
Անվերջ կրկնությունների միտումը որպես «զոհ է» ընտրել այս անգամ Քեթրին Բիգելոուի 1991 թ. գերազանց մարտաֆիլմը, որի շնորհիվ աշխարհը ճանաչեց Քիանու Ռիվզին, իսկ կանայք գաղտնի սիրահարվեցին Պատրիկ Սուեյզիի կերտած կերպարին: Անիմաստ և անողոք հոլիվուդյան «հոսքագիծը» ռեժիսորի աթոռին նստացրեց մինչ այդ անհայտ Էրիքսոն Քորին, իսկ սիրված դերասաններին փոխարինեցին երկրորդ դերերում աննկատ մնացած Ռամիրեսով և Բրյեսիով: Այստեղ արդեն մի կանոն է գործում. լավ ֆիլմի ռեմեյքը կարող է այդքան լավը չլինել, սակայն, պետք է լի լինի հատուկ էֆեկտներով և ֆիզիկայի բոլոր կանոնները խախտող գործողություններով: Թիրախային լսարանին նման մոտեցումը դուր է գալիս, թեև հույս է մնում, որ կինոդիտումից հետո մերօրյա դպրոցականները կորոշեն ծանոթանալ նաև օրիգինալին: