Լավ համակարգչային խաղն, անկասկած, Ամանորի հրաշալի նվեր կարող է լինել: Ճիշտ ընտրություն կատարելու համար PanARMENIAN.Net-ը ներկայացնում է 2015-ի համակարգչային խաղերի լավագույն հնգյակը:
Rise of the Tomb Raider
Արկածային մարտախաղ, RPG
Մշակողներ` Microsoft Studios, Square Enix
Հարթակներ` Xbox One, Xbox 360, Microsoft Windows (2016թ. սկիզբ), PlayStation 4 (2016-ի ավարտ)
Դամբարաններ թալանող Լարա Քրոֆթի արկածների մասին պատմող համակարգչային խաղերի լեգենդար շարքը սկիզբ է առել դեռ 1996-ին: Այդ օրվանից թողարկվել են բազում շարունակություններ և լրացումներ, ինչը թույլ է տվել այդ խաղաշարին երկրպագուների հսկայական բանակ ձեռք բերել ամբողջ աշխարհում: Rise of the Tomb Raider-ը շարքի 10-րդ խաղն է և 2013-ի վերաթողարկման շարունակությունը: Իրադարձությունները ծավալվում են Սիբիրում` Լարա Քրոֆթը մեկնում է առեղծվածային արտեֆակտի որոնումների, որն անմահություն է տալիս գտնողին: Լինելով տարվա ամենասպասված խաղերից մեկը` Rise of the Tomb Raider-ը օգտագործում է համակարգչային խաղերի ոլորտի բոլոր վերջին նվաճումները, աչքի ընկնելով հարմար կառավարմամբ, գերազանց գրաֆիկայով և հետաքրքիր սյուժեով, որը կարող է տասնյակ ժամերի տևողությամբ խաղ ապահովել:
Metal Gear Solid V: The Phantom Pain
Սթելս-էքշըն
Մշակող` Kojima Productions
Թողարկող` Konami Digital Entertainment
Հարթակներ` PlayStation 3, PlayStation 4, Xbox 360, Xbox One, Microsoft Windows
Անցնող տարվա նշանակալի խաղերից մեկն է, ոչ միայն բարձր որակի շնորհիվ, այլ նաև նրա թողարկման հետ կապված սկանդալի պատճառով: Metal Gear Solid ամբողջ շարքի անփոփոխ հեղինակ Հիդեո Կոդզիման անարդարացիորեն վտարվեց ճապոնական Konami հսկայի կողմից, ինչն այնքան էլ փայլուն հեռանկարներ չի խոստանում այս խաղաշարին: Չնայած դրան, Կոդզիմային հաջողվել է, սեփական ստեղծածին հատուկ մոտեցմամբ և մանրամասների հանդեպ ուշադրությամբ, հանրությանը ներկայացնել ոչ թե ուղղակի խաղ, այլ հսկայական մի աշխարհ իր տրամաբանությամբ և չափազանց խճճված, դրամատիկ սյուժեով: Ընդ որում, խաղացողը ստանում է գործողությունների գրեթե լիակատար ազատություն, որի շնորհիվ կարող է հաճույքով շաբաթներ շարունակ անցկացնել այդ վիրտուալ աշխարհում:
Fallout 4
Action/RPG
Մշակող` Bethesda Game Studios
Թողարկող` Bethesda Softworks
Հարթակներ` Windows, PlayStation 4, Xbox One
Լեգենդար խաղաշարի ևս մեկ շարունակություն: Առաջին խաղերն այնքան բարդ էին ու բազմաշերտ, որ մինչ օրս համարվում են դերակատարային համակարգչային խաղերի օրինակ: 4-րդ խաղն արժանի շարունակությունն է, նույնքան հետաքրքիր, բազմազան և դաժան հետապոկալիպտիկ աշխարհի իրողությունների մեջ ամբողջովին ընկղմվելու ցանկությամբ: Fallout 4-ի գլխավոր արժանիքը ոչ միայն հսկայական չափերի քարտեզն ու հետաքրքիր լոկացիաների և քվեսթերի հսկայական քանակն է: Ամենակարևորն այստեղ այն է, որ խաղացողը կարող է խաղարկային աշխարհում անել այն ամենն, ինչ կամենա` սկսած ցանկացած որակներով ու արտաքինով կերպար ստեղծելուց, վերջացրած անսահման Ամայության տարածքով դեգերումներով, սեփական գաղութի ստեղծմամբ, զենքի կատարելագործմամբ և այլն:
The Witcher 3: Wild Hunt
Action/RPG
Մշակող` CD Projekt RED
Թողարկողներ` Cdp.pl, Bandai Namco Entertainment, Warner Bros. Interactive Entertainment, Spike Chunsoft
Հարթակներ` Windows, PlayStation 4, Xbox One
Եվս մեկ «խաղահարթակ» միանգամայն բաց աշխարհով, առանց խաղային գործընթացի որևէ սահմանափակման: Մշակողների CD Projekt RED լեհական ստուդիան հայտնի է աշխարհում իր արտադրանքի բարձր որակով` յուրաքանչյուր նոր նախագիծ գլուխգործոց է մանրակրկիտ կատարմամբ, որի մշակումը տարիներ է պահանջում: Ստուդիան սովոր չէ չմշակված խաղ ներկայացնել շուկայում, ուստի մշակման բոլոր փուլերում այն հասցվում է փայլուն մակարդակի և կարող է նույնիսկ ամենափորձառու խաղացողի հիացմունքն առաջացնել: Հիմնված լինելով լեհ գրող Անջեյ Սապկովսկու ֆենտեզի վեպերի վրա` The Witcher 3: Wild Hunt արժանիորեն համարվում է 2015-ի լավագույն խաղը:
Bloodborne
Action/RPG, survival horror
Մշակողներ` From Software, SCE Japan Studio
Թողարկող` Sony Computer Entertainment
Հարթակ` PlayStation 4
Թերևս ընթացիկ տարվա ամենայուրահատուկ և հիշվող համակարգչային խաղն է, որի մասին խոսակցությունները չեն մարում արդեն բավական երկար ժամանակ: Շատ մռայլ, վիկտորիանական և գոթիկային հատուկ մթնոլորտով դաժան, արնաշաղախ խաղը և հիասքանչ հրեշները անցումն անմոռանալի են դարձնում: Մինչև ամենափոքր մանրուքները հիանալի ձևավորված խաղարկային աշխարհով, բրուտալ գլխավոր հերոսով և, ամենագլխավորը, իր մեծ բարդությամբ, Bloodborne-ը պարտական է ճապոնացի հեղինակ Հիդետակա Միյաձակիի հանճարին, որը մի քանի տարի առաջ իրարանցում առաջացրեց խաղերի աշխարհում հիանալի DarkSouls-ով: Խաղը բարեհաճ չէ խաղացողի գործողությունների հանդեպ, այստեղ բավականին հեշտ է սխալվելը, սակայն հենց բազում փորձերի ու սխալների միջով անցումն է դարձնում այն այդքան հիշարժան: