Ժանրի ֆիլմերից շատերն արդեն մոռացվել են, մյուսների մասին, հավանաբար, չեք էլ լսել. PanARMENIAN.Net-ը ներկայացնում է իրական հանցագործների մասին պատմող մեծ տարածում չստացած ֆիլմերից մի քանիսը:
«Բրոնսոն»(Bronson), 2008թ.
Դանիացի Նիկոլաս Վինդինգ Ռեֆնի ինքնատիպ ռեժիսորական ձեռագիրը թույլ տվեց ներկայացնել 20-րդ դարի քրեական աշխարհի ամենաբարդ ներկայացուցիչներից մեկի կենսագրությունը: Չարլզ Բրոնսոնը (Մայքլ Գորդոն Փիթերսոն) համարվում է Մեծ Բրիտանիայի ամենադաժան կալանավորը, որն իր բազում հանցագործությունների համար ավելի քան 30 տարի է անցկացրել բանտում` ավելի քան 120 ուղղիչ հաստատությունում: Բրոնսոնի դերը վստահվեց այն ժամանակ ոչ այնքան հայտնի Թոմ Հարդիին, որը հիանալի կատարեց իր առջև դրված խնդիրը:
«Երկնային արարածներ» (Heavenly Creatures), 1994 թ.
Նորզելանդացի Փիթեր Ջեքսոնը հայտնի է լայն շրջանակներին որպես «Մատանիների տիրակալը» հայտնի եռապատումի հեղինակ, սակայն քչերը գիտեն, որ իր կարիերայի սկզբում նա ստեղծել է 90-ականների ամենաբարդ հոգեբանական թրիլերներից մեկը: Ֆիլմը հիմնված է անչափահաս մարդասպան Պոլին Փարկերի օրագրի վրա, որը ներկայացնում է սարսափելի իրադարձությունները, որոնք տեղի են ունեցել նորզելանդական Քրայսչերչում 1954-ին: Ջեքսոնը կարողացավ ոչ միայն սովորական սարսափ ֆիլմի մակարդակից վեր մնալ, այլ նաև առավելագույն հավաստիությամբ փոխանցել այդ տարիքին հատուկ պատանեկան մաքսիմալիզմը:
Բուչ Քեսիդին և Սանդենս Քիդը (Butch Cassidy and the Sundance Kid), 1996թ.
Ջորջ Ռոյ Հիլլի մի ժամանակ շատ սիրված կինոնկարը գրեթե անծանոթ է մերօրյա կինոդիտողին: Եվ դա, չնայած նրան, որ $6 մլն բյուջեի դեպքում այն վաստակել է այն ժամանակների համար աստղաբաշխական գումար` $102 մլն, նաև արժանանալով 4 «Օսկարի»: Ֆիլմի հիմքում իրական իրադարձություններ են Վայրի Արևմուտքի երկու լեգենդար ավազակներ Բուչ Քեսիդիի և Սանդենս Քիդի (1867-1908) կյանքից, որոնք զբաղվում էին բանկերի և բեռնատար գնացքների կողոպուտով: Դասական դարձած ֆիլմը մինչ օրս համարվում է ժանրի իսկական էտալոն և պարտադիր է դիտման համար:
«Ամերիկյան հանցագործություն» (An American Crime), 2007թ.
Թոմի Օ’ Հեվերի քրեական դրաման հիմնված է 16-ամյա Սիլվիա Լայքենսի կտտանքների և սպանության իրական պատմության վրա, որն իրականացրել էր տնային տնտեսուհի Գերտրուդա Բանիշևսկայան: Այս դեպքը լայն արձագանք ստացավ ԱՄՆ-ում և համարվեց «մարդու դեմ կատարված վատագույն հանցագործությունն Ինդիանայում»: էլեն Փեյջի և Քեթրին Քիների մասնակցությամբ այս դաժան դրամայի պրեմիերան տեղի ունեցավ Showtime կաբելային ալիքի եթերում, թեև ի սկզբանե նախատեսվում էր ցուցադրել այն մեծ էկրանին:
«Շուգարլենդի էքսպրեսը» (The Sugarland Express), 1974 թ.
Մեծն Սթիվեն Սփիլբերգի առաջին ռեժիսորական աշխատանքը մեծ էկրանին միանգամից հայտնի դարձրեց նրան ստուդիաների ղեկավարների շրջանում և կանխորոշեց նրա հետագա ճակատագիրը: Վարպետն իրական պատմություն է պատմել, որը տեղի է ունեցել 1969-ին Տեխասում հանցագործ ամուսիններ Դենթերի հետ և արել է դա այնպիսի վարպետությամբ և լավ ռեժիսուրայով, որ անմիջապես բազում գովաբանական արձաքանքների է արժանացել քննադատների կողմից: Սփիլբերգի նկարահանող խմբի խորհրդատուն էր իրադարձությունների անմիջական մասնակիցներից մեկը` պարեկային Քեննեթ Քրոուն, որին Դենթերը պատանդ էին վերցրել:
«Կոկաին» (Blow), 2001 թ.
Բոսթոնցի Ջորջ ածականով Ջորջ Յանգը 1970-80-ականներին ԱՄՆ-ում կոկաինի առևտրի շուկայում գլխավոր դերակատարներից մեկն էր և գործում էր Պաբլո Էսկոբարի Մեդելյինի կարտելի կազմում, որը մաքսանենգ ճանապարհով մատակարարում էր ԱՄՆ մտնող կոկաինի մոտ 85 տոկոսը: Թեդ Դեմմեի ֆիլմը հիմնված է Յանգի կյանքի իրական պատմության վրա` Ջոնի Դեփի և Պենելոպե Քրուզի հիանալի դերասանական խաղով: Հետաքրքիր է, որ նկարահանումներին պատրաստվելիս Դեփը մի քանի օր անցկացրել է Յանգի հետ ուղղիչ հաստատությունում: Նկարահանումների ամբողջ ընթացքը տեղի է ունեցել ոստիկանության խիստ հսկողությամբ, որը հետևում էր դերասանների յուրաքանչյուր քայլին, որպեսզի ոչ ոքի մոտ, առավել իրատեսություն հաղորդելու նպատակով, նկարահանումների ընթացքում օգտագործվող սպիտակ փոշու փոխարեն իսկական կոկաինից օգտվելու ցանկություն չառաջանար: