Ավելի ճիշտ՝ 10,000 NFT-ի: Յուրաքանչյուր NFT-ի արժեքը 2100 դոլար է: Այսինքն, բոլոր կտորները վաճառելուց հետո Կլիմտի «Համբույրը» կշարունակի կախված մնալ Բելվեդերում, բայց ավստրիական պատկերասրահը 21 միլիոն դոլար կաշխատի:

NFT-ն թվային աշխարհում 2021-ի ամենաքննարկված թեման էր: Արվեստի աշխարհը հեղափոխած և վիրտուալ տարածքում իրենց հաղթարշավը սկսած NFT-ները փոխում են արվեստի գործերի և արվեստագետի մասին մարդկանց պատկերացումները: Վիրուսային արագությամբ փոփոխվող այս կրիպտոաշխարհում թանգարանները և պատկերասրահները փորձում են պահպանել իրենց տեղը, դիրքն ու նշանակությունը: Որոշ թանգարաններ NFT աշխարհն իրենց մրցակից են համարում, մյուսները որոշել են օգտվել NFT-ի տված բարիքներից: Ի դեպ, եթե դեռ լավ չեք պատկերացնում, թե ինչ է NFT-ն կամ ինչու են բոլորը դրա մասին խոսում, կարող եք նախ կարդալ մեր տեղեկագիրը և հետո շարունակել թանգարանների թեման:

Թանգարաններն NFT աշխարհում նորեկներ են: Երկու հիմնական նպատակ ունեն՝ ձեռքը պահել ժամանակի զարկերակին և հավելյալ եկամուտ ստանալ: Հարյուր հազարավոր դոլարներ վաստակելը ֆինանսական խնդիրներ ունեցող թանգարանների ու պատկերասրահների համար շատ գայթակղիչ կարող է լինել: Եվ հետո՝ թանգարաններում արվեստի պատմությունն է պահվում, իսկ NFT-ները մի օր անպայման այդ պատմության մասն են դառնալու:

Համավարակի ծանր ամիսներին այս սցենարով շարժվեց Ֆլորենցիայի Ուֆֆիցի պատկերասրահը: Բոտիչելլիի և Միքելանջելոյի գլուխգործոցները դարձան NFT-ներ: Միքելանջելոյի «Մադոննա Դոնի» կտավի NFT-ն պատկերասրահը վաճառեց 170.000 դոլարով: Գնորդը իտալացի մի կին էր, որը «Սուրբ Ընտանիք» կտավի NFT-ն որոշել էր նվիրել ամուսնուն:

NFT արշավին միացել է նաև Լոնդոնի ամենամեծ և աշխարհի ամենահայտնի թանգարաններից մեկը՝ Բրիտանական թանգարանը: 2021-ի վերջին թանգարանը վաճառքի հանեց ճապոնացի նկարիչ Կացուշիքա Հոքուսայի 200 աշխատանքների NFT-ներ: Աշխատանքների թվում էր նաև Հոքուսայի հայտնի «Մեծ ալիքը», որի NFT-ն վաճառվեց 45 հազար դոլարով: Արվեստաբանները քննադատեցին Բրիտանական թանգարանին, մեղադրեցին «անիմաստ վերարտադրումներին» մշակութային նշանակություն տալու մեջ և պնդեցին, որ թանգարանը կզղջա այս որոշման համար, երբ NFT-ները սկսեն արժեզրկվել: Թանգարանից էլ պատասխանեցին, որ փորձում են սովորել, լսել իրենց այցելուներին, ծանոթանալ նրանց հետաքրքրությունների հետ և քայլել ժամանակին համընթաց:

2022-ը ևս սկսվել է գործակցության նոր ծրագրերով: Իտալական 4 թանգարաններ պատրաստվում են վաճառել Ռաֆայելի, Կարավաջոյի, Մոդիլիանիի ստեղծագործությունների NFT-ները: Արժեքները 100.000-500.000 դոլարի միջակայքում են: Հավաքված գումարն ուղղելու են արվեստի այդ գլուխգործոցների բնօրինակների պահպանմանը:

Իրավիճակը փոքր ինչ այլ է Ռուսաստանում: Թեև շատ թանգարաններ ցանկություն ունեն իրենց ուժերը փորձել NFT-ների աշխարհում, բայց օրենսդրությունը թույլ չի տալիս: Ռուսաստանում կրիպտոարժույթով գործարքներն արգելված են: Խնդրի լուծումը գտել է Էրմիտաժը: Թանգարանը Լեոնարդո դա Վինչիի, Կլոդ Մոնեի, Վինսենթ վան Գոգի, Ջորջոնեի և Վասիլի Կանդինսկու 5 կտավների NFT-ների վաճառքից 450 հազար դոլար է աշխատել: Ամենաթանկը վաճառվել է Լեոնարդո դա Վինչիի կտավի NFT-ն՝ 150 հազար դոլար: Գումարը թանգարանը ստացել է միջնորդների միջոցով:

Այս փուլում NFT-ներ վաճառող թանգարաններն ավելի շատ բացառությունն են, քան օրինաչափությունը, բայց աճի հստակ միտում կա: Շատ թանգարաններ արդեն գիտակցում են, որ մեր թվայնացված կյանքում NFT-ները ժամանակակից արվեստի էվոլյուցիայի հերթական փուլն են: Այս առումով NFT-ները թանգարանների համար կարող են դառնալ նոր սերնդի հետ կապը չկորցնելու կամ համավարակի ֆոնին ֆինանսական տխուր վիճակը շտկելու լավ հարթակ: