Հովհաննես Դավթյանը միշտ շատ հեշտությամբ է պատասխանում ցանկացած հարցերի, և PanARMENIAN.Net- ի բլից-հարցազրույցը բացառություն չէր: Այս անգամ էլ նա խոսեց շատ հանգիստ ու հետաքրքիր:
Բնութագրիր քեզ:
Հանգիստ և նպատակասլաց:
Ի՞նչ սովորություններ ունես:
Եվ լավ և վատ (ծիծաղում է):
Քո ուժեղ կողմերը:
Եթե իմ առջև նպատակ եմ դնում, անպայման այն իրագործում եմ:
Քո սիրած գիրքը:
Ճիշտն ասած, ժամանակի սղության պատճառով չեմ հասցնում գրքեր կարդալ:
Ի՞նչ ֆիլմեր ես նախընտրում:
Հայկական ֆիլմեր:
Խոհանոցում շա՞տ ես լինում և ի՞նչ ես սիրում պատրաստել:
Հազվադեպ եմ ինչ որ բան պատրաստում, բայց եթե նման բան լինում է, ապա` ձվածեղ:
Ըստ քեզ ամենագեղեցիկ քաղաքը:
Ռիո դե Ժանեյրոն, քանի որ այն նման չէ որևէ քաղաքի և իր գեղեցկությամբ ու գույներով տարբերվում է մյուսներից:
Քո անմոռանալի ելույթը:
2009 թվականի աշխարհի առաջնությունում է եղել, երբ ինձ հաջողվել է բրոնզե մեդալ նվաճել: Մեր քաշային կարգի աշխարհի չեմպիոն Գեորգի Զանտարային եմ կարողացել հաղթել, այդ պատճառով էլ այդ ելույթն առանձնահատուկ է ինձ համար:
Քո սիրած մարզիկը:
Չունեմ սիրած մարզիկներ:
Քո մարզաձևի հետ կապված վատ հիշողություններ:
Յուրաքանչյուր պարտություն վատ հիշողություն է դառնում:
Ձյուդոյից բացի քո ամենասիրած 3 մարզաձևերը:
Ֆուտբոլ, ըմբշամարտ և հոկեյ:
Օլիմպիական խաղերում հայ մարզիկներից ո՞ւմ ելույթն է քեզ հատկապես դուր եկել:
Բոլոր նրանց, ում հաջողվել է մեդալ նվաճել:
Երազանքները դառնում են իրականություն, երբ…
Իրականանում են:
Ինչքան շատ ենք մենք օգնում մարդկանց, այնքան…
Մեզ ավելի լավ ենք զգում:
Ես միշտ չէ, որ գիտեմ, թե …
Ես ճիշտ եմ անում:
Առանց երևակայության մարդը …
Միօրինակ ու ձանձրալի է:
Պարտությունները միշտ հիշելով`…
Ուժեղանում եմ: