2 սեպտեմբերի 2011 - 19:58 AMT
ՀԱՐՑԱԶՐՈՒՅՑ
ՖՈՏՈՇԱՐՔ
Վիկ Դարչինյան.
Լավագույն հանգիստն ինձ համար Հայաստանում ընտանիքիս հետ հանգիստն է, և ես շատ եմ սիրում ծովային խոհանոց
PanARMENIAN.Net-ը ներկայացնում է IBO վարկածով աշխարհի չեմպիոն Վիկ Դարչինյանի հարցազրույցի երկրորդ մասը բռնցքամարտիկ Էվանս Մբամբայի դեմ մենամարտից առաջ: Հայերի ամենասիրած մարզիկը PanARMENIAN.Net-ի թղթակցին պատմել է իր ընտանիքի և սիրած ճաշատեսակների մասին, կիսվել ապագայի պլաներով և դիմել իր բազմահազար երկրպագուներին:
Քո կարծիքով ո՞վ է բոլոր ժամանակների լավագույն բռնքամարտիկը և ո՞վ է ամենալավը մեր օրերում:
Ամենալավը Մայկ Թայսոնն է, որ հետ ես ընկերություն եմ անում: Ես մանկուց երազել եմ մենամարտել նրա դեմ, ցանկանում էի լինել նույնքան ուժեղ և ֆիզիկապես ամուր, ինչպես նա: Բայց, ցավոք սրտի, ես ցածրահասակ եմ և հանդես եմ գալիս թեթև քաշային կարգերում: Իսկ մեր օրերում շատ ուժեղ է Մեննի Պակյայոն, նա շատ խելացի բռնցքամարտիկ է:

Շատ բռնցքամարտիկներ նկարահանվել են տարբեր ֆիլմերում և դարձել կենսագրական ֆիլմերի հերոսներ: Քեզ արվե՞լ են նման առաջարկություններ:
Ինձ առաջարկել են նկարահանել փաստագրական ֆիլմ իմ մասին, իմ կարիերայի, մենամարտերի և ձեռքբերումների մասին: Տեսնենք, թե ինչ դուրս կգա դրանից:

Արի մի փոքր խոսենք քո անձնական կյանքի մասին: Հետաքրքիր է, թե ինչպես ես ծանոթացել կնոջդ հետ և ինչպես ես նրան առաջարկություն արել:
Կնոջս հետ ծանոթացել եմ 2001-ին, երբ ինձ հրավիրեցին հանդես գալ Ավստրալիայում, որտեղ էլ մենք հանդիպեցինք Սիդնեյում՝ Opera house-ի մոտ: Եվ մեկ տարի հետո ամուսնացանք:

Ո՞ր խոհանոցն ես նախընտրում և ի՞նչ ես սիրում ուտել:
Շատ եմ սիրում ծովամթերք, Ավստրալիայում դրանք շատ տարածված են: Իհարկե, սիրում եմ նաև հայկական խոհանոց, գլխավորը, որպեսզի ուտելիքը համեղ լինի:

Սովորաբար ռուսական ազգային խոհանոցից ինչպիսի՞ ճաշատեսակներ է պատրաստում կինդ:
Պելմենի, բորշչ, ընդհանրապես նա շատ համեղ է պատրաստում:

Քո տղան արդեն 4 տարեկան է, ո՞վ է սովորաբար զբաղվում նրա դաստիարակությամբ:
Մենք երկուսս էլ զբաղվում ենք նրա դաստիարակությամբ: Ռուբենը շատ խելացի, բայց ամաչկոտ երեխա է: Մեզ համար շատ կարևոր է, որպեսզի նա լինի պարզ և շփվող մարդ: Ես այսպիսին եմ դարձել ծնողներիս շնորհիվ և ցանկանում եմ, որպեսզի նույն կերպ դաստիարակվի նաև իմ որդին:

Ո՞վ է կինդ մասնագիտությամբ և ինչո՞վ է նա հիմա զբաղվում:
Նա անգլերենի դասախոս է և այդ ժամանակ Ռուսաստանից եկել էր Ավստրալիա գիտելիքները կատարելագործելու համար, բայց այնտեղ մնաց հանուն ինձ: Հիմա նա չի աշխատում և զբաղվում է մեր որդու դաստիարակությամբ:

Ո՞վ է քո ամենալավ ընկերը, ո՞վ է միշտ քո կողքին և միշտ օգնում է քեզ:
Ես նման մի քանի ընկերներ ունեմ, ովքեր միշտ ինձ հետ են մենամարտերի ժամանակ: Նրանք երկու Արմեններն են Հայաստանից, Ջամալը՝ Լիբանանից, իմ մենեջեր Էլիասն Ավստրալիայից, և ես շատ ուրախ եմ, որ ես ունեմ նման նվիրված և հավատարիմ ընկերներ:

Ինչպե՞ս քեզ կբնութագրես:
Օյ, շատ է բարդ է խոսել սեփական անձի մասին: Ավելի լավ է այդ մասին հարցրեք ուրիշներին:

Ավարտիր, խնդրում եմ, այս նախադասությունը. «Լավագույն հանգիստն ինձ համար, երբ…»
Ես ընտանիքիս հետ Հայաստանում եմ:

Դու երկրպագուներ ունես գրեթե բոլոր երկրներում, ի՞նչ կցանկանայիր ասել մարդկանց, ովքեր միշտ աջակցում են քեզ:
Ցանկանում եմ շնորհակալություն հայտնել բոլորին: Իմ կարիերայում եղել են նաև պարտություններ, բայց նրանք չեն լքել ինձ և շարունակել են հավատարիմ մնալ: Շնորհակալ եմ նրանց դրա համար:

Մենք ավարտում ենք մեր զրույցը, և հիմա դու կարող ես ասել այն ամենը, ինչ ցանկանում ես կամ ինչի մասին հիմա մտածում ես:
Ցանկանում եմ նվաճել առնվազն երեք գոտի և նոր պատմություն գրել բռնքամարտի մեջ: Բոլոր հայերին մաղթում եմ խաղաղություն, սեր և հաջողություն: Շնորհակալ եմ ձեզ հաճելի զրույցի համար:

Վիկ Դարչինյանի հարցազրույցի առաջին մասը

Գոհար Նալբանդյան, Հասմիկ Բաբայան / PanARMENIAN News
ՖՈՏՈՇԱՐՔ