Առայժմ չի որոշվել ընկերությունը, որը դիտարկելու է ռուս-վրացական սահմանով բեռների տեղափոխումը: Այդ մասին երկուշաբթի օրը ճեպազրույցում հայտարարել է Վրաստանի ԱԳՆ ղեկավարի տեղակալ Նինո Կալանդաձեն:

Ռուսական և վրացական կողմերից կողմից ԱՀԿ-ին Ռուսաստանի անդամակցության վերաբերյալ ձեռք բերված համաձայնագրի արդյունքում սահմանով բեռների տեղափոխման դիտարկումն իրականացնելու է շվեյցարական մասնավոր ընկերություններից մեկը:

Ինչպես հաղորդել են PanARMENIAN.Net-ի թղթակցին Վրաստանի ԱԳՆ-ից, ընկերության անունը հայտնի կդառնա մարտի 27-ին վրացական պատվիրակության՝ Շվեյցարիա կատարելիք այցի ընթացքում:

Ռուսաստանի և Վրաստանի սահմանին «Վերին Լարս» ՀԱԿ-ն ապահովում է միակ ուղիղ ցամաքային տրանսպորտային կապը Հայաստանի և Ռուսաստանի միջև: Թուրքիայի և Ադրբեջանի կողմից Հայաստանի շրջափակման պայմաններում «Վերին Լարսը» կարևոր դեր է խաղում արտաքին աշխարհի հետ երկրի տնտեսական կապերի մեջ: