«Իրանի վրա Իսրայելի հարձակվելու հարցը բավական բարդ է: ԽՍՀՄ փլուզումից հետո միջազգային հարաբերություններում անորոշությունն աճում է այնքան անշեղորեն, որքան լարվածությունը: Թվում է, ոչ մեծ երկրի քաղաքական գործչի մտքով անգամ չէր կարող անցնել հարձակվել Ռուսաստանի վրա, սակայն պրն Սահակաշվիլին 2008-ին արեց դա, իսկ կանխատեսելի ջախջախումից հետո կարողացավ պարտությունը ներկայացնել որպես հաղթանակ, և վրացական հասարակությունը հավատաց նրան»,- ասել է PanARMENIAN.Net-ին Ռազմավարական հետազոտությունների ռուսական ինստիտուտի կովկասյան հետազոտությունների բաժնի պետ Յանա Ամելինան: Նրա խոսքով, դրանից հետո տարածաշրջանում ինչ-որ բան կանխատեսելն անհնար է: Ռուս փորձագետը նշել է, որ հասարակական և քաղաքական խելագարության աստիճանն այնքան բարձր է, որ իրավիճակը պահանջում է ոչ թե քաղաքագետների վերլուծություն, այլ համապատասխան որակավորում ունեցող բժիշկների: «Ուստի Իսրայելը կարող է հարձակվել Իրանի վրա, հնարավոր է՝ ոչ: Անկասկած, ընդհանուրի շահերից է բխում, որպեսզի նա դա չանի, իսկ ահա թե ինչ կլինի իրականում, շուտով կիմանանք, բայց լավ կլինի ոչ սեփական մաշկի վրա»,- ասել է Յանա Ամելինան: