«Ժառանգության» նախընտրական շտաբի ղեկավար, «Ազատ դեմոկրատներ» կուսակցության առաջնորդ Խաչատուր Քոքոբելյանը, մեկնաբանելով ընդդիմադիր ուժերի տարաձայնությունները մեծամասնական ընտրատարածքներում միասնական թեկնածուների վերաբերյալ, առաջարկել է այսուհետև բանակցություններն անցկացնել բաց և հրապարակավ, ԶԼՄ-ների ներկայությամբ: «Անձամբ ես խոստանում եմ, որ փակ բանակցություններ չեմ անցկացնի ոչ մի քաղաքական ուժի հետ, լինի դա իշխանամետ, թե ընդդիմադիր ուժ»,- Երևանում մամլո ասուլիսում հայտարարել է նա: Քոքոբելյանը նշել է, որ ինքը և իր ընկերները հասարակությունից թաքցնելու բան չունեն:
«Ժառանգության» նախընտրական շտաբի ղեկավարը նաև նշել է, որ շատերը փորձում են տպավորություն ստեղծել, որ ընդդիմությունը գալիք ընտրություններում կպայքարի ընդդիմության հետ: «Մենք չենք պայքարի ընդդիմության հետ: Մեր ընտրազանգվածը կայուն է և հստակ ընդգծված… Մենք կարիք չունենք ձայներ խլելու այլ ընդդիմադիր ուժերից»,- ասել է նա:
Քոքոբելյանն առաջարկել է ընդդիմադիր ուժերին չպայքարել միմյանց դեմ, այլ կենտրոնացնել իրենց ջանքերն իշխող կոալիցիայի հետ պայքարի վրա:
