«Ես վստահ եմ, որ մենք հաղթելու ենք մայիսի 6-ի ընտրություններում և ունենալու ենք օրինաց երկիր»,-հայտարարել է ՀՀ գյուղատնտեսության նախարար Սերգո Կարապետյանը՝ ելույթ ունենալով Երևանի Ազատության հրապարակում ընթացող հանրահավաքում:
Իր հերթին ՕԵԿ փոխնախագահ Մհեր Շահգելդյանը հավելել է, որ «ՕԵԿ հաղթանակը Հայաստանի, նրա քաղաքացիներ շահերի հաղթանակը կլինի»:
ՊՆ նախկին մամլո քարտուղար Դավիթ Կարապետյանը կոչ է արել հավաքվածներին մտածել, թե ինչ միջոցներով են որոշ թեկնածուներ «բարեգործություն» անում, հիշել, որ բաժանած դիզվառելիքը կվերջանա, իսկ ասֆալտը կքանդվի:
Հանրահավաքում ելույթներ են ունենում ՕԵԿ մարզային բաժանմունքների ներկայացուցիչները, որոնք վստահություն են հայտնում, որ կուսակցությունը նախագահ Արթուր Բաղդասարյանի գլխավորությամբ կհաղթի առաջիկա խորհրդարանական ընտրություններում:
Ազատության հրապարակում ընթացող ՕԵԿ հանրահավաքին մասնակցում է մոտ 3000 մարդ:
Խորհրդարանական ընտրությունները Հայաստանում տեղի կունենան մայիսի 6-ին: Ընտրություններին մասնակցում են ութ քաղաքական ուժեր՝ ՀՀԿ, ԲՀԿ, ՀՅԴ, ՕԵԿ-ը, «Ժառանգությունը, Հայաստանի դեմոկրատական կուսակցությունը, Կոմունիստական կուսակցությունը, «Միավորված հայեր» կուսակցությունները և մեկ նախընտրական դաշիքն ի դեմս ՀԱԿ-ի:
