Տնտեսական նոր կապերի հաստատումը և համատեղ ձեռնարկությունների հիմնումը ՀՀ առևտրաարդյունաբերական պալատի արտաքին քաղաքականության առաջնահերթություններից է։ Այդ շրջանակներում «Հայէլեկտրամեքենա» ընկերության նախագահ Սեյրան Մաթևոսյանը և Իրանի Իսլամական Հանրապետության «Խորասան գյուղարդյունաբերություն» ընկերության գործադիր տնօրեն Հադի Աբդոլլահյանը ապրիլի 17–ին Պալատում կնքեցին հայ–իրանական համատեղ ձեռնարկություն հիմնելու պայմանագիր, որով նախատեսվում է «Հայէլեկտրամեքենա» ընկերության տարածքում հիմնել հեղուկներ արտամղող խորքային պոմպերի արտադրություն:
ՀՀ առևտրաարդյունաբերական պալատի նախագահ Մարտին Սարգսյանի հավաստմամբ՝ բազմաթիվ նոր աշխատատեղեր ստեղծելով հանդերձ՝ կունենանք հայրենական նոր արտադրատեսակ, որը դուրս է գալու արտաքին շուկա՝միաժամանակ կատարելով նաև հայաստանյան պատվերները։ Հայրենական նոր առավել խնայողական պոմպերը կփոխարինեն արտերկրից ներմուծվող երբեմն ցածրորակ ու հատկապես տեղափոխման պատճառով բարձր գին ունեցող արտադրանքին, հայտնում է ՀՀ առևտրաարդյունաբերական պալատի լրատվական ծառայությունը:
